جاڭا زەلانديادا تابيعات توسىن مىنەز تانىتتى

نۇر-سۇلتان. قازاقپارات -جاڭا زەلانديادا قاتتى جەل تۇرىپ، قار ارالاس جاڭبىر جاۋدى. كۇن رايىنىڭ كۇرت وزگەرۋىنە بايلانىستى كەي اۋدانداردا توتەنشە جاعداي جاريالاندى. مەكتەپتەر جابىلىپ، اۋە رەيستەرى كەيىنگە شەگەرىلدى.

مەكسيكا حالقى دا تەڭىزدەن سوققان داۋىلدىڭ زاردابىن تارتىپ وتىر. ال ا ق ش- تا كەرىسىنشە كۇن شىجىپ تۇر. بۇگىن جاڭا زەلانديادا اۋا رايى توسىن مىنەز تانىتتى. انتاركتيكادان سوققان سۋىق جەلدەن كۇن كۇرت سۋىتىپ، ايماقتا قار ارالاس جاڭبىر جاۋدى. تاڭسارىدەن شەلەكتەپ قۇيعان جاۋىن وسىلايشا جاڭا زەلانديالىقتاردى ءبىراز ابىگەرگە سالدى. ەل استاناسى ۆەللينگتوندا جولدار جابىلىپ، اۋە رەيستەرى كەيىنگە شەگەرىلدى. تەڭىزدىڭ تاسۋىنان كەمەلەر دە توقتادى. ەندى كۇن قاباعى جاقىن ارادا جايدارى مىنەز تانىتپاسا، جاعالاۋعا جاقىن تۇراتىن تۇرعىندار تۇگەل قاۋىپسىز جەرگە كوشىرىلمەك.

مەكسيكادا دا بۋىرقانا سوققان تەڭىز تولقىندارى تۇرعىنداردىڭ ۇرەيىن قاشىرا باستادى. سەبەبى تابان استىنان اسىپ تاسىعان ەنريكە داۋىلى ناياريت پەن حاليسكو شتاتتارىندا ويران سالادى دەگەن قاۋىپ بار. سينوپتيكتەردىڭ ايتۋىنشا، تولقىنداردىڭ بيىكتىگى 8 مەترگە دەيىن جەتۋى مۇمكىن. بۇعان قوسا 46 سانتيمەترگە دەيىن ىلعال ءتۇسىپ، ونىڭ ارتى سۋ تاسقىنى مەن لاي كوشكىنىنە ۇلاسادى دەگەن بولجام بار.

مارگاريتا مەندەس، ۇلتتىق مەتەورولوگيالىق قىزمەتىنىڭ باس ۇيلەستىرۋشىسى:

- ەنريكە تروپيكالىق داۋىلعا اينالادى دەپ وتىرمىز. دەسە دە، ەندىك بويىنشا ۇلعايا بەرسە، ول كوپ ۇزاماي باسىلادى. ويتكەنى تومەنگى كاليفورنياعا جاقىنداعان سايىن ول سۋىق سۋمەن بايلانىسقا تۇسەدى.

ال ا ق ش- تا اپتاپ ىستىق ەلدىڭ ەسىن شىعارىپ جاتىر. بىرنەشە كۇننەن بەرى پورتلەند پەن سيەتتلدە سىناپ باعاناسى 40 گرادۋستان تومەندەمەي تۇر. بۇل اتالعان ايماقتار ءۇشىن رەكوردتىق كورسەتكىش. ىندەت ۋاقىتىندا جۇرت ۆيرۋستان ەمەس، كۇننەن قورعانۋدىڭ قامىنا كىرىسكەن. ءبىرى سۋ بويىن جاعالاپ، جان باقسا، ەندى ءبىرى جەلدەتكىشى بار ورتالىقتارعا كەلىپ، سالقىن سۋسىنمەن ىستىعىن باسۋدا.

- دالا وتە ىستىق. سوندىقتان سالقىنداعىسى كەلگەن ازاماتتار ءۇشىن ارنايى شاتىر ورناتىپ، سۋسىندار قويدىق. كاليفورنيادا شىجىعان كۇننەن ورمان القاپتارى وتقا ورانىپ جاتىر.

جالىن 800 دەن استام گەكتار جەرگە تارالىپ ۇلگىرگەن. دەسە دە، ءورت ەلدى مەكەندەرگە قاۋىپ ءتوندىرىپ تۇرعان جوق. تەك تاس جولداعى كولىك قاتىناسىنا اسەر ەتكەن. ال كوستا- ريكادا جانارتاۋ اتقىلادى. قويۋ ءتۇتىن 2 شاقىرىم بيىكتىككە كوتەرىلگەن. وسىعان بايلانىستى توتەنشە جاعداي قىزمەتى تۇرعىنداردى ساق بولۋعا شاقىرىپ، جانارتاۋعا جاقىن نىسانداردىڭ قاۋىپسىزدىگىن تەكسەرۋگە كوشتى.

www.24.kz