اباي شىعارمالارى تۇڭعىش رەت نورۆەگ تىلىندە ۇسىنىلدى
بۇل ەڭبەك نورۆەگ تىلىنە اۋدارىلعان قازاق كلاسسيكالىق ادەبيەتىنىڭ العاشقى ۇلگىسى بولىپ تابىلادى.
«قازاقستان پرەزيدەنتى قاسىم-جومارت توقايەۆ، اباي مۇراسىنا ۇلتىمىزدىڭ بىرلىگى مەن وركەندەۋىنە جول اشاتىن قۇندى بايلىق رەتىندە جۇگىنۋگە شاقىرادى. ءبىز اباي شىعارمالارىنىڭ نورۆەگ تىلىندە جارىق كورۋىن قازاقستان تاۋەلسىزدىگىنىڭ 30 جىلدىعىنا ارنايمىز»، - دەدى پرەزەنتاتسيادا قازاقستاننىڭ نورۆەگياداعى ەلشىسى ەركىن احينجانوۆ.
اباي شىعارمالارىن نورۆەگ تىلىنە تاجىك-نورۆەگ جازۋشىسى جانە ادەبيەتتانۋشى ليۋتفيا بوبوەروۆا اۋداردى.
كىتاپتى «Sirkel Forlag» باسپاسى شىعارعان، باس رەداكتورى جانە اباي جايلى ءومىرباياندىق تاراۋ جازعان نورۆەگ عالىمى جانە باسپاگەرى وسحيلد كيۋلوس.
«اباي دارا قوعامدىق سىنشى بولدى، ءبىراق ونى ءبىرىنشى كەزەكتە ەكزيستەنتسيالدىق ماسەلەلەر تولعانتتى. ابايدىڭ «قارا سوزدەرى» الەمدىك ادەبي مۇرانىڭ ماڭىزدى بولىگى بولىپ تابىلادى. اباي شىعارمالارىن نورۆەگ تىلىنە اۋدارۋ - قازاقستاندى نورۆەگياعا تانىستىرۋدىڭ بىرەگەي مۇمكىندىگى.
بۇعان قوسا، بۇل جالپى ادامزات تاجىريبەسىنە ۇلى ويشىلدىڭ كوزقاراستارىمەن ءبولىسۋ مۇمكىندىگى دە بولىپ تابىلادى. ءبىزدىڭ باسپا بۇل جوبانى جوعارى باعالايدى»، - دەدى و. كيۋلوس.
«اباي قۇنانباي ۇلىنىڭ شىعارمالارى ەشقاشان ەسكىرمەيدى، كەرىسىنشە ۋاقىت وتە كەلە ولارعا سۇرانىس كۇشەيە بەرەدى. ولار قوعامنىڭ كونە، ءتۇپ-تامىرى شابىلماعان ماسەلەلەرىن ناقتى سۋرەتتەيدى، ەلگە باعىت باعدار بەلگىلەيدى. ابايدىڭ وسيەت سوزدەرىن ءار ادام ءبىلىم، ادامگەرشىلىك پەن سىپايىلىق ساباقتارىن الا الاتىن ءومىر مەكتەبى دەپ اتاۋعا بولادى.
اباي وتباسى نەگىزدەرىنە، بالا تاربيەلەۋگە، تىلدەردى وقۋ مەن وزگە مادەنيەتتەرمەن تانىسۋعا كوڭىل بولەدى. سونىمەن قاتار، اباي ادەبيەت بىلگىرى بولعان. ونى شابىتتاندىرعانداردىڭ اراسىندا فيرداۋسي، نيزامي جانە ناۆوي سياقتى شىعىس كلاسسيكتەرىنەن باستاپ ورىستىڭ كوركەم ءسوز شەبەرلەرى - لەرمونتوۆ، تولستوي مەن پۋشكين، باتىستىڭ اقىندارى - گەتە مەن گەينە بولدى.
ول 120-150 جىل بۇرىن دا، بۇگىنگى تاڭدا دا وزەكتى، ۋاقىتتان تىس ماسەلەلەر تۋرالى جازعان.
نورۆەگيا وقىرماندارى اباي شىعارمالارىنان كوپتەگەن پايدالى جانە ادەمى تاعىلىمدار الا الاتىنىنا سەنىمدىمىن»، - دەپ اتاپ ءوتتى ل. بوبوەروۆا.
نورۆەگتەر الەمدەگى كىتاپتى ەڭ كوپ وقيتىن حالىقتاردىڭ ءبىرى ەكەنىن ەسكەرىپ، اۋدارمانىڭ جوعارى ساپاسىن عانا ەمەس، سونىمەن قاتار كىتاپتىڭ قالىڭ وقىرمانعا قول جەتىمدىلىگىن قامتاماسىز ەتۋ ماڭىزدى بولدى. كىتاپ 1500 دانامەن باسىلىپ، نورۆەگيا كىتاپحانالارىندا جانە كىتاپ دۇكەندەرىندە، سونداي-اق سيفرلىك پلاتفورمالاردا تاراتىلدى.
اۋديو نۇسقاسى دا جازىلعان. باسىلىم قازىر لوندونداعى كىتاپ كورمەسىندە دە تانىستىرىلۋدا.
