قاراعاندى ساياباعىندا جەرلەنگەن ارىستاننىڭ ءولىم سەبەبى اتالدى

نۇر-سۇلتان. قازاقپارات – مال دارىگەرلەرى قاراعاندى ورتالىق ساياباعىندا جەرلەنگەن ارىستاننىڭ ءولىم سەبەبىن اتادى.

مال دارىگەرلەرىنىڭ مالىمەتىنشە، ساياباقتان تابىلعان اڭ افريكالىق ارىستاننىڭ 10 ايلىق كۇشىگى. ونىڭ اتى مارس جانە قاراعاندى زووساياباعىندا تۇرعان. ارىستاننىڭ دەنەسىن اشقاندا، ونىڭ ينفەكسيالىق اۋرۋدان ولگەنى بەلگىلى بولعان. سونىمەن قاتار يەسى مال دارىگەرلەرىنە حابارلاسقان جانە ۆەتەرينارلىق قۇجات پەن قاجەتتى انىقتامالارى بار.

«15-ماۋسىمدا جانۋار اۋىرىپ، جەكە مال دارىگەرلىك ەمحاناسىندا ەمدەلگەن. جۇرگىزىلگەن ەمدىك شارالارعا قاراماستان، 22-ماۋسىمدا ول ولگەن. جانۋاردىڭ دەنەسى تابىلعان سوڭ ميحايلوۆسك پوليتسيا ءبولىمىنىڭ جازباشا ۇيعارىمى بويىنشا جەكە مال دارىگەرلىك ەمحانادا دەنەگە پاتولوگاناتوميالىق زەرتتەۋ جۇرگىزىلدى. ناتيجەسىندە جانۋاردىڭ پانلەيكوپەنيا سەكىلدى ينفەكسيالىق اۋرۋمەن اۋرۋى مۇمكىن ەكەنى انىقتالدى. بۇعان ىشەكتىڭ جۋان بولىگىنىڭ جانە شاجىرقايدىڭ جاعدايى مەن قۇرساق قۋىسىندا جينالعان سۇيىقتىق دالەل بولا الادى. اۋرۋ مەن ءولىم اراسىندا تىكەلەي بايلانىس بار»، - دەپ حابارلادى قاراعاندى وبلىسى ايماقتىق ۆەتەرينارلىق باقىلاۋ جانە قاداعالاۋ ينسپەكسياسىنداعىلار.

ارىستاننىڭ دەنەسى اشىلعان سوڭ جانۋارلار زيراتىندا، بەككاري شۇڭقىرىندا جويىلدى. قازىر پوليتسيا قىزمەتكەرلەرى يەسىنىڭ ارىستاندى نەلىكتەن ساياباق اۋماعىندا كومگەنىن انىقتاپ جاتىر. تەرگەۋ اياقتالعاننان كەيىن ارىستاننىڭ يەسى جانۋاردىڭ ولگەنىن حابارلاماعانى ءۇشىن اكىمشىلىك جاۋاپقا تارتىلۋى مۇمكىن.

ەسكە سالايىق، قاراعاندى ساياباعىندا جەرلەنگەن ارىستان تابىلعانى تۋرالى اقپارات 25-ماۋسىمدا پايدا بولدى.

Tengrinews.kz