اقتوتى رايىمقۇلوۆا مادەنيەت پەن ونەردى ناسيحاتتاعان جۋرناليستەردى ماراپاتتادى

نۇر-سۇلتان. قازاقپارات - ەلوردادا قازاقستان رەسپۋبليكاسىندا مادەنيەت پەن ونەردى ناسيحاتتاعان جۋرناليستەرگە «التىن توميريس» سىيلىعىن تاپسىرۋ سالتاناتى ءوتتى، دەپ حابارلايدى قازاقپارات.

سىيلىقتى ق ر مادەنيەت جانە سپورت مينيسترلىگى مەن «استانا وپەرا» تەاترى تاعايىنداعان. «التىن توميريس» العاش رەت تاپسىرىلدى.

ق ر مادەنيەت جانە سپورت ءمينيسترى اقتوتى رايىمقۇلوۆا ب ا ق وكىلدەرىنە «التىن توميريس» ماراپاتتارىن، قۇرمەت گراموتالارى مەن «قازاق وپەراسىنىڭ اڭىز ادامدارى» ەستەلىك كىتاپتارىن تابىس ەتتى.

«التىن توميريس» مۇسىنشەسى «استانا وپەرا» تەاترى عيماراتىنىڭ جوعارى جاعىنداعى كۆادريگا تۇرىندە جاسالعان. وندا كۇيمە اربانىڭ تىزگىنىن ۇستاعان ساق پاتشايىمى توميريس بەينەلەنگەن.

ماراپاتتالعاندار قاتارىندا «حابار 24»، «قازاق ت ۆ»، «قازاقستان»، «اباي ت ۆ»، «مير»، «ەۋرازيا» ءبىرىنشى ارناسى» تەلەارنالارى، «ەگەمەن قازاقستان»، «كازاحستانسكايا پراۆدا»، «استانا اقشامى»، «ۆەچەرنيايا استانا»، «نوۆوە پوكولەنيە»، «ليتەر»، «كاراۆان» گازەتتەرى، Tengrinews.kz, Zakon.kz، «قازاقپارات» ح ا ا، Sputnik كازاحستان، Nur.kz, Baigenews.kz اقپارات اگەنتتىكتەرىنىڭ تىلشىلەرى، سونىمەن قاتار تانىمال قازاقستاندىق بلوگەرلەر بار.

سالتاناتتى ءراسىم اياقتالعان سوڭ جۋرناليستەردى تەاتردىڭ شىعارماشىلىق ۇجىمى قۇتتىقتاپ، مەرەكەلىك كونسەرت تارتۋ ەتتى. ساحنادا وپەرا ترۋپپاسىنىڭ سوليستەرى - قازاقستاننىڭ ەڭبەك سىڭىرگەن قايراتكەرى جاميليا دجاركيمبايەۆا، ەلەنا گانجا، اسەم سەمبينا، رامزات بالاكيشيەۆ، شىڭعىس راسىلحان، «كۆيكونتە» ۇرلەمەلى اسپاپتار كۆينتەتى جانە كونسەرتمەيستەر راۋشان بەسكەمبيروۆا ونەر كورسەتتى.