قازاقستان سوڭعى ۇلگىدەگى «تور» زەنيت- زىمىران كەشەنىن ساتىپ الماقشى
قورعانىس مينيسترىلىگىنىڭ اپپارات كەڭەسىندە قارۋلى كۇشتەرگە جاڭا اۋە شابۋىلىنا قارسى قورعانىس كەشەنىن جەتكىزۋ جوسپارلانعانى جونىندە ايتىلدى. اتالمىش وتىرىستا اسكەردى قايتا جاراقتاندىرۋ ءىس- قيمىلى باياندالدى. بۇگىندە اۋە شابۋىلىنا قارسى قورعانىس قۇرالدارى باستى نازاردا.
2019-2020 -جىلدارى قازاقستان اسكەرىنىڭ قارۋلانۋىنا رەسەيدىڭ «بۋك» زەنيت- زىمىران كەشەندەرى، بەلارۋستىڭ «روسا» راديولوكاتسيا ستانسالارى، سونداي- اق ەلىمىزدىڭ اۋە شەپتەرىن قورعاۋىندا تۇرعان وتاندىق «نۇر» رلس جەتكىزىلدى. جۋىردا زاماناۋي «تور- م2ك» زەنيت- زىمىران كەشەندەرىن جەتكىزۋ جوسپارلانىپ وتىر. «تور- م2ك» كەز- كەلگەن ۇلگىدەگى ۇشاق پەن تىكۇشاقتى، سونىڭ ىشىندە «كورىنبەيتىن» تەحنولوگيامەن جاسالعان تىكۇشاقتاردى عانا ەمەس، سونىمەن قاتار درونداردى، جوعارى دالدىكتەگى قارۋدى، سونىڭ ىشىندە راديولوكاتسياعا قارسى جانە قاناتتى زىمىرانداردى، باسقارىلاتىن اۆياتسيا بومبالارىن انىقتاپ، جويۋعا قابىلەتتى. قازىرگى ۋاقىتتا ۋاكىلەتتى ورگان (يندۋستريا جانە ينفراقۇرىلىمدىق دامۋ مينيسترلىگى) جەتكىزۋشىمەن شارتتار جاساسۋدا.
قورعانىس مينيسترلىگى اتالعان كەشەندى ازىرلەگەن زاۋىتتا وتاندىق اۋە شابۋىلىنا قارسى قورعانىس ماماندارىن وقىتۋدى جوسپارلاپ وتىر. جيىندا قولباسشىلار بارىنشا جەكە قۇرام جۇمىلدىرىلعان ماماندىق بويىنشا دايارلىق بارىسىن باياندادى. جاۋىنگەرلىك وقۋدىڭ بۇل كەزەڭىنىڭ قورىتىندىسى الداعى اپتاداعى باقىلاۋ ساباقتارىنىڭ ناتيجەسىنە قاراي شىعارىلادى. اسكەري وقۋ ورىندارىن ءبىتىرۋ راسىمدەرىنە بايلانىستى، شىلدەدە جاس وفيتسەرلەر مەن سەرجانتتار قىزمەت اتقارۋعا بارادى. قولباسشىلارعا ولاردىڭ قىزمەتتىك مىندەتتەرگە بەيىمدەلۋىن، لاۋازىمدى قابىلداۋىن، سونداي- اق الەۋمەتتىك ماسەلەسىن شەشۋدى قاراستىرۋىن قامتاماسىز ەتۋگە نۇسقاۋ بەرىلدى. قارۋلى كۇشتەردەگى COVID-19-عا ۇجىمدىق يممۋنيتەت قالىپتاسقانىن ەسكەرە وتىرىپ، جاۋىنگەرىلىك دايارلىق شارالارى تولىق دەڭگەيدە وتكىزىلۋى ءتيىس.
باس اسكەري- مەديتسينالىق باسقارماسىنىڭ باستىعى جەكە قۇرامنىڭ 82 پايىزى ەكپەنىڭ ەكى كومپونەنتىن العانىن باياندادى. سونىمەن قاتار، الەۋمەتتىك قاشىق پەن بەتپەردە رەجيمىن ساقتاۋ وزەكتى كۇيىندە قالىپ وتىر. بۇدان وزگە دە، قورعانىس ءمينيسترى ەلدەگى سانيتاريا- ەپيدەميولوگيا شارالارى كۇشەيتىلۋىنە بايلانىستى وڭىرلەردەگى اكىمشىلىكتەرمەن الدىن الۋ شارالارىنا قارۋلى كۇشتەردى قاتىستىرۋ ماسەلەسىن قاراۋدى تاپسىردى. اتاپ وتسەك، وبەكتىلەردى دەزينفەكتسيالاۋ، اسكەري- دالالىق گوسپيتال اشۋ، ازاماتتارعا كومەك كورسەتۋ ءۇشىن مەديتسينا توپتارىن قۇرۋ. «ارميا مەملەكەت اتقارىپ جاتقان شارالاردان تىس قالماۋى كەرەك»، - دەپ اتاپ ءوتتى گەنەرال- مايور نۇرلان ەرمەكبايەۆ.
مينيستر قاتىسقان ماسكەۋدەگى IX حالىقارالىق قاۋىپسىزدىك جونىندەگى كونفەرەنتسيانىڭ قورىتىندىسىن ەسكەرىپ، ۇلتتىق قورعانىس ۋنيۆەرسيتەتى مەن باس اسكەري- مەديتسينالىق باسقارماسىمەن بىرىگىپ اسكەري مەديتسينانى تاجىريبەدە قولدانۋ شەڭبەرىندە عىلىمي زەرتتەۋلەر جۇرگىزۋدى تاپسىردى. ولار وتاندىق جانە شەتەلدىك تاجىريبەگە جۇگىنە وتىرىپ، ەمدەۋ باعىتىن عانا ەمەس، سونداي- اق مەديتسينالىق قىزمەتتىڭ كۇشتەرى مەن قۇرالدارىن ەشەلونداپ ورنالاستىرۋ، لوگيستيكا، جاۋىنگەرلىك ازىرلىككە كەلتىرۋگە قاجەتتى مەرزىمدەر، مەديتسينالىق پەرسونالمەن جاساقتاۋ جانە ەرەكشە جاعدايدا قوسىمشا مەديتسينالىق مەكەمەلەردى جابدىقتاۋ سياقتى اسكەري قىرلارىن دا نەگىزگە الىپ، ەسكەرۋى قاجەت.
قورعانىس ۆەدومستۆوسىنىڭ باسشىسى قارۋلى كۇشتەر ارداگەرلەرىنىڭ جۇيەلى جۇمىسىنا نازار اۋداردى. اسكەردىڭ مۇددەسى ءۇشىن وسى قىزمەتتە مول تاجىريبەسى بار بۇرىنعى اسكەري قىزمەتشىلەردى كوپتەگەن سالالارعا تارتۋ قاجەت. بۇل اسكەري- پاتريوتتىق تاربيە، قولدانىستاعى زاڭدى جەتىلدىرۋ، سونداي- اق قارۋلى كۇشتەردىڭ كەيبىر باعىتتارىن دامىتۋ. تاربيە جانە يدەولوگيالىق جۇمىستار دەپارتامەنتىنە «قارۋلى كۇشتەردىڭ ارداگەرلەرى» رەسپۋبليكالىق قوعامدىق بىرلەستىگىنىڭ جۇمىسىن جانداندىرۋ تاپسىرىلدى.
