قارۋ ۇستاپ سۋرەتكە تۇسكەن استانا تۇرعىنى قاماۋعا الىندى

نۇر-سۇلتان. قازاقپارات - پوليتسيا «ۆكوناكتە» الەۋمەتتىك جەلىسىنە قارۋ ۇستاپ تۇسكەن سۋرەتىن سالعان ەلوردا تۇرعىنىن ۇستادى، دەپ حابارلايدى قازاقپارات ءتىلشىسى.

نۇر-سۇلتان قالاسى پوليتسيا دەپارتامەنتىنىڭ باسپا ءسوز قىزمەتى استانالىق جىگىت اسكەري كيىممەن قارۋ اسىنىپ سۋرەتكە ءتۇسىپ، ونى «ۆكونتاكتە» الەۋمەتتىك جەلىسىندە جاريالاعانىن جازادى.

ال قالا تۇرعىندارىنىڭ ءبىرى «102» ارناسىنا حابارلاسىپ، الەۋمەتتىك جەلىدە ۇلىنا قارۋ ۇستاپ سۋرەتكە تۇسكەن بەلگىسىز ادامنان ەرتەڭ ەلوردادا «كوڭىلدى بولاتىنى» تۋرالى حابارلاما كەلگەنىن ايتقان.

«پوستتىڭ اۆتورى ۇستالىپ، پوليتسياعا جەتكىزىلدى. ول 23 جاستاعى ەلوردا تۇرعىنى بولىپ شىقتى. Airsoft-كە اۋەستىگى بار جىگىت بۇل پوستى «ۆكونتاكتە» پاراقشاسىندا جازىلۋشىلار سانىن كوبەيتۋ ءۇشىن جاريالاعانىن ايتىپ وتىر. اتالعان فاكت بويىنشا قىلمىستىق كودەكستىڭ 287-بابى بويىنشا سوتقا دەيىنگى تەرگەۋ جۇرگىزىلۋدە. سونىڭ اياسىندا اتىس قارۋىنىڭ كىمگە تيەسىلى ەكەنىن انىقتاۋ ءۇشىن بالليستيكالىق ساراپتاما تاعايىندالدى. پوليتسيا دەپارتامەنتى قارۋدى زاڭسىز يەمدەنگەنى، بەرگەنى، وتكىزگەنى جانە ساقتاعانى ءۇشىن زاڭ بويىنشا قىلمىستىق جاۋاپكەرشىلىك قاراستىرىلعانىن ەسكەرتەدى»، - دەلىنگەن دەپارتامەنتتىڭ مالىمەتىندە.