نۇر-سۇلتاندا كوروناۆيرۋس جۇقتىرعانداردىڭ باسىم بولىگى - قوعامدىق كولىكپەن جۇرەتىندەر
بۇل تۋرالى نۇر-سۇلتان قالاسىنىڭ باس مەملەكەتتىك سانيتارلىق دارىگەرى سارحات بەيسەنوۆا ايتتى، دەپ حابارلايدى قازاقپارات ءتىلشىسى.
«وسى ۋاقىتقا دەيىن ءبىز ۆاكسينانى قابىلداۋ اركىمنىڭ جەكە شەشىمى دەپ ەسەپتەدىك. بۇل شىنىمەن دە سولاي. ءبىراق ءسىز ۇيدە وتىرساڭىز، جۇمىسقا كەلمەسەڭىز، باسقا ادامدارمەن قارىم-قاتىناس جاساماساڭىز عانا. ستاتيستيكا قازىر ىندەتكە شالدىققانداردىڭ باسىم كوپشىلىگى قوعامدىق كولىكتى بەلسەندى پايدالاناتىندار جانە ادامدار كوپ جينالاتىن ساۋدا ورتالىقتارى، ويىن-ساۋىق جانە مادەني مەكەمەلەر، بارلار مەن مەيرامحانالار سىندى ورىندارعا باراتىن كىسىلەر ەكەندىگىن كورسەتىپ وتىر. بۇل اۋرۋدىڭ وسۋىنە نەگىزگى تۇرتكى - جۇمىس جاسايتىن ادامدار توبى. سوندىقتان اعزانى سەنىمدى قورعاۋ قاجەت. ال بۇل ارينە - ۆاكسيناتسيا»، - دەدى ول.
ونىڭ اتاپ وتۋىنشە، قورقىنىشتى اۋرۋدى توقتاتۋ، ادام ءولىمىن بولدىرماۋ ءۇشىن قىسقا مەرزىمدە جاپپاي ۆاكسيناتسيالاۋ جۇرگىزۋ قاجەت.
«وسىنداي قاجەتتى جانە جاۋاپتى شەشىمدى دۇرىس ءتۇسىنىپ، قولداۋلارىڭىزدى سۇرايمىن. ۆاكسيناتسيامەن قاتار، الەۋمەتتىك قاشىقتىقتى ساقتاۋ، قورعانىس ماسكالارىن كيۋ، قول گيگيەناسىن ساقتاۋ جانە ادامدار كوپ جينالاتىن جەرلەرگە بارماۋ سياقتى الدىن-الۋ ءىس-شارالارىن ساقتاۋ دا وتە ماڭىزدى. ەڭ باستىسى، بۇقارالىق جانە ۇجىمدىق ءىس-شارالارعا قاتىسپاۋ جانە ۇيىمداستىرماۋ قاجەت»، - دەدى سارحات بەيسەنوۆا.
