قازاقپارات فوتو ءتىلشىسى «ەڭبەك ارداگەرى» مەدالىمەن ماراپاتتالدى

نۇر-سۇلتان. قازاقپارات - «قازاقپارات» حالىقارالىق اقپارات اگەنتتىگىنىڭ فوتو ءتىلشىسى ۆيكتور فەديۋنين «ەڭبەك ارداگەرى» مەدالىمەن ماراپاتتالدى، دەپ حابارلايدى قازاقپارات.

سالا ارداگەرىنە اتالمىش مەدالدى اقپارات جانە قوعامدىق دامۋ ءمينيسترى ايدا بالايەۆا تابىستادى. ۆيكتور فەديۋنيننىڭ فوتوجۋرناليستيكا سالاسىندا ەڭبەك ەتىپ كەلە جاتقانىنا 20 جىلدان اسقان.

«فوتوجۋرناليستيكادا 2000 -جىلداردان بەرى جۇمىس ىستەپ كەلەمىن. اۋەلى باسىندا «استانا اقشامىندا» فوتو ءتىلشى بولىپ باستادىم. ودان كەيىن رەسپۋبليكالىق «وكو» گازەتىندە جۇمىس ىستەدىم. 2006 -جىلدان بەرى «قازاقپارات» ساپىندا ەڭبەك ەتىپ كەلەمىن. جۇمىسىم وزىمە وتە ۇنايدى. ۇجىم دا، جۇمىس قارقىنى دا ۇنايدى. ءارقاشان اقپاراتتىڭ الدىندا جۇرۋگە تالپىنامىز. ال ءبىز اقپارات تاراتاتىن وقيعالار وتە كوپقىرلى. حالىقارالىق دەڭگەيدەگى اۋقىمدى شارالاردان حابار تاراتۋ كەزىندە تىلشىلەرمەن قاناتتاسىپ جۇمىس ىستەۋدىڭ ءوزى قىزىقتى. ولار جازعان اقپاراتتىڭ سۋرەتپەن ارلەپ مازمۇنىن اشۋ - ءبىزدىڭ مىندەتىمىز. ماعان وسى مىندەتتى مۇلتىكسىز اتقارۋ ۇنايدى»، - دەيدى ۆيكتور فەديۋنين.

اۆتور: ەسىمجان ناقتىباي