جويىلىپ كەتۋ قاۋپى بار جانۋار ەسىك قالاسىندا ۆيدەوعا ءتۇسىرىلدى

نۇر-سۇلتان. قازاقپارات - الماتى وبلىسى ەسىك قالاسىندا قازاقستاندا جويىلىپ كەتۋ قاۋپى بار سيرەك كەزدەسەتىن جانۋار ۆيدەوعا ءتۇسىرىلدى.

جايرا (كىرپىكشەشەننىڭ ءبىر ءتۇرى) قالا كوشەلەرىنىڭ بىرىندە تۇسىرىلگەن. مۇنىڭ ءوزى سيرەك كەزدەسەتىن جاعداي. بۇل تۋرالى ەكولوگيا، گەولوگيا جانە تابيعي رەسۋرستار مينيسترلىگىنىڭ باسپا ءسوز حاتشىسى سامال يبرايەۆا مالىمدەدى، - دەپ حابارلايدى Tengrinews.kz ءتىلشىسى.

ۆيدەو اۆتورىنىڭ مالىمەتى بويىنشا، ەرەكشە جانۋاردى ول ەسىكتەگى اباي كوشەسىندە كورگەن.

الەۋمەتتىك جەلى قولدانۋشىلارى تاڭدانىستارىن جاسىرا الماي جانۋاردىڭ قايدان كەلگەنىن، قىستان قالاي امان شىقانىن ايتىپ تالقىلاپ جاتىر. الايدا قازاقستاننىڭ ەكولوگيا، گەولوگيا جانە تابيعي رەسۋرستار مينيسترلىگى جابايى جايرا قازاقستاندا بۇرىننان بار ەكەنىن ايتتى. سوندىقتان ونى قۇتقارۋ ماقساتىندا ارەكەت جاساۋدىڭ قاجەتى جوق. دەگەنمەن جانۋاردىڭ تاۋلى جەردەن ادامدار اراسىنا ءتۇسۋى سيرەك كەزدەسەدى.

«ءۇندى جايراسى - بۇل كەمىرگىشتەر وتريادىنا كىرەدى. قازاقستان فاۋناسىندا بۇل وتريادتىڭ جالعىز ءتۇرى بار. ول وڭتۇستىك ماڭعىشلاقتا، تالاس، قىرعىز جانە ىلە الاتاۋى مەن قاراتاۋدا، شۋ- ىلە تاۋلارىندا كەزدەسەدى. الماتى وبلىسىنىڭ اۋماعىندا ىلە الاتاۋىندا كەزدەسەدى. XX عاسىردىڭ ءبىرىنشى جارتىسىندا الماتى قالاسىنىڭ ماڭىندا كەڭ تاراعان. تارالۋ ايماعى تۇرگەن وزەنىنىڭ القابىنا دەيىن جەتەدى. ءبىراق انتروپوگەندىك فاكتور (ادام فاكتورى) ولاردى تاريحي اۋماعىنان ىعىستىرعان. ىلە- الاتاۋ مەملەكەتتىك ۇلتتىق تابيعي پاركىنىڭ دەرەكتەرى بويىنشا، ىلە الاتاۋى مەن وعان ىرگەلەس جاتقان اۋماقتاردىڭ شەگىندە ءۇندى جايراسىنىڭ سانى 30 باستان اسپايدى»، - دەدى سامال يبرايەۆا.

جايرا قازاقستاننىڭ قىزىل كىتابىنا سيرەك كەزدەسەتىن جانە جويىلىپ بارا جاتقان جانۋار ءتۇر رەتىندە ەنگىزىلگەن.

«ق ر ق ك- نىڭ 339-بابىنا سايكەس قۇرىپ كەتۋ قاۋپى بار جانە سيرەك كەزدەسەتىن جانۋارلار مەن وسىمدىكتەرگە زيان كەلتىرگەندەرگە قىلمىستىق جاۋاپكەرشىلىك كوزدەلگەن. باپ سانكتسياسى مۇلكىن تاركىلەپ، ءۇش مىڭ ايلىق ەسەپتىك كورسەتكىشكە دەيىن ايىپپۇل سالۋدى، نە سول مولشەردە تۇزەۋ جۇمىستارىنا، نە سەگىز ءجۇز ساعاتقا دەيىنگى مەرزىمگە قوعامدىق جۇمىستارعا تارتۋدى، نە ءۇش جىلعا دەيىنگى مەرزىمگە باس بوستاندىعىن شەكتەۋدى، نە سول مەرزىمگە باس بوستاندىعىنان ايىرۋ جاساسىن كوزدەيدى. سونداي- اق، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان بەس جىلعا دەيىنگى مەرزىمگە ايىرادى»، - دەدى ەكولوگيا، گەولوگيا جانە تابيعي رەسۋرستار مينيسترلىگى وكىلى.