قىتايداعى باس سانيتاردىڭ قاۋلىسى قازاقستاننىڭ ەت نارىعىن شىعىنعا ۇشىراتتى

نۇر-سۇلتان.قازاقپارات -وتاندىق ەت وندىرۋشىلەر قىتاي نارىعىنا ءونىم جەتكىزە الماي شىعىنعا باتىپ وتىر. «مۇنىڭ باستى سەبەبى پاندەميا» دەيدى «قازاقستان ەت وداعىنىڭ» باس ديرەكتورى.

ايتۋىنشا، شىڭجاڭ- ۇيعىر اۆتونوميالىق ولكەسىنىڭ باس سانيتارلىق دارىگەرىنىڭ قاۋلىسىنا سايكەس، ەلىمىزدەن يمپورتقا تىيىم سالىنعان. قازاقستان تاراپى ەت وڭدەۋ زاۋىتتارىنداعى جۇمىسشىلاردى ۆاكسينالاۋ مەن تەستىلەۋدى ۇسىنعانىمەن ماسەلە ءالى دە شەشىلەر ەمەس.

ماقسۇت باقتىبايەۆ، «قازاقستان ەت وداعىنىڭ» باس ديرەكتورى:

- ەتكە سۇرانىس بار. الايدا قىتايعا ەكسپورت توقتاپ تۇر. ءتىپتى ۇلكەن ىقپالعا يە قىتايلىق ءىرى كومپانيالار دا ماسەلەنى شەشۋدىڭ امالىن تاپپاي ءجۇر. ول تىكەلەي شىڭجاڭ- ۇيعىر اۆتونوميالىق ولكەسىمەن بايلانىستى. كوپتەگەن وتاندىق وندىرۋشىلەر شىعىنعا باتتى.

www.24.kz