فۋتبولدان ەۋروپا چەمپيوناتى: نيدەرلاندى چەحياعا جول بەردى

نۇر- سۇلتان. قازاقپارات - فۋتبولدان ەۋروپا چەمپيوناتىنىڭ شيرەك فينالىنا جولداما العان ءۇشىنشى قۇراما انىقتالدى، دەپ حابارلايدى قازاقپارات ءتىلشىسى.

ءدۇبىرلى دودانىڭ 1/8 فينالىنداعى ەكىنشى كەزدەسۋدە نيدەرلاندى مەن چەحيا جاسىل الاڭعا شىقتى. ەكى قۇراما بۇعان دەيىن 11 مارتە كەزدەستى. ونىڭ 5 ىندە چەحيا باسىم ءتۇسىپ، 3 ىندە نيدەرلاندىنىڭ مەرەيى ۇستەم بولدى، قالعانىندا تەڭ ناتيجە تىركەلدى. ايتا كەتەرلىگى، سوڭعى رەت نيدەرلاندى اتالعان قارسىلاسىن 2005 -جىلدىڭ 18-قازانىندا الەم چەمپيوناتىنا ىرىكتەۋ كەزەڭىندە جەڭگەن بولاتىن. سودان بەرى ەكى كەزدەسۋدە چەحيالىقتار باسىم ءتۇستى.

بۇگىنگى كەزدەسۋدە قوس قۇراما تەرەزەسى تەڭ دەڭگەيدە ويىن كورسەتتى. ەكىنشى كەزەڭنىڭ 55-مينۋتىندا نيدەرلاندىلىق ماتتەيس دە ليگت قىزىل قاعاز الىپ، الاڭنان قۋىلدى. بۇدان كەيىن نيدەرلاندىلىق فۋتبولشىلار تىزگىندى قارسىلاستارىنا بەرىپ قويعانداي كورىندى. ناتيجەسىندە چەحيالىقتار قاتارىنان توماش گولەش 68-مينۋتتا ەسەپ اشسا، 80-مينۋتتا پاتريك چيك ەسەپتى ۇستەمەلەي ءتۇستى.

ويىندا چەحيا قارسىلاسىن 2:0 ەسەبىمەن جەڭدى. ەندى ولار 3-شىلدەدە شيرەك فينالدا ازەربايجان استاناسى باكۋ قالاسىنداعى وليمپيادا ستاديونىندا شەبەرلىك بايقاسادى.

ەسكە سالساق، بۇدان بۇرىن دانيا ءۋەلستى 4:0 ەسەبىمەن جەڭىپ، يتاليا اۋستريانى وۆەرتايمدا 2:1 ەسەبىمەن تىزە بۇكتىردى.