جاڭگىر حان تۋرالى تاريحي تەلەحيكايانىڭ ءتۇسىرىلىمى باستالدى
«اقپارات جانە قوعامدىق دامۋ مينيسترلىگىنىڭ تاپسىرىسىمەن ەل تاريحىنا قاتىستى تاعى ءبىر تانىمدىق تەلەحيكايانى ءتۇسىرۋ جۇمىسى باستالدى. «ساراي سىرى» سەريالى - بوكەي ورداسىندا 1823-1845 -جىلدارى بيلىك قۇرعان جاڭگىر حاننىڭ تۇلعاسى، حاندىقتىڭ ىشكى ءومىرى مەن سول كەزەڭنىڭ كەيبىر تاريحي ساتتەرى تۋرالى بولماق. كەشە شىعارماشىلىق توپپەن ارنايى كەزدەسىپ، ءتۇسىرىلىم جۇمىسىنا تىلەكتەستىك بىلدىردىك»، - دەپ جازدى اقپارات جانە قوعامدىق دامۋ ءمينيسترى ايدا بالايەۆا FacebooK - تە.
مينيستر ق ر پرەزيدەنتى قاسىم- جومارت توقايەۆ ۇلتتىق كينوعا، سونىڭ ىشىندە تاريحي تۋىندىلارعا ەرەكشە كوڭىل ءبولۋ كەرەكتىگى تۋرالى ۇنەمى ءسوز قوزعايتىنىن ايتىپ ءوتتى.
«سەبەبى، كينو ونەرى - كورەرمەنگە تەك ءبىر ساتتىك قىزىقتى دۇنيە جاساپ شىعۋ ەمەس. بۇل، ەڭ ءبىرىنشى كەزەكتە، قوعامنىڭ ساناسىن جاڭعىرتاتىن يدەولوگيالىق تاربيە قۇرالى. سوندىقتان، بۇگىنگى تاۋەلسىزدىكتىڭ 30 جىلدىعى بەلەسىندە، ەگەمەن ەلدىڭ كوزقاراسىمەن وتكەن تاريحىمىزدى قايتا تۇگەندەپ، اسىرەسە وسكەلەڭ ۇرپاققا ۇلت تۇلعالارىن تەرەڭ تانىستىرىپ وتىرۋدىڭ ماڭىزى زور. كىلەڭ تالانتتى ونەر مايتالماندارىنىڭ قاتىسۋىمەن تۇسىرىلەتىن تەلەحيكايا بيىك تالعامدى كورەرمەن قاۋىمنىڭ كوڭىلىنەن شىعىپ، قوعام تاراپىنان زور ىقىلاسقا يە بولادى دەپ سەنەمىن. شىعارماشىلىق ۇجىمعا ساتتىلىك تىلەيمىن!»، - دەدى ايدا بالايەۆا.
