«ۇلى دالا تاڭى» فيلمىنىڭ ءتۇسىرىلىمى قالاي ءجۇرىپ جاتىر - فوتو

نۇر-سۇلتان. قازاقپارات – ق ر مادەنيەت جانە سپورت ءمينيسترى اقتوتى رايىمقۇلوۆا باستاعان دەلەگاتسيا الماتى وبلىسى قاپشاعاي قالاسىنىڭ ماڭىندا ورنالاسقان «ۇلى دالا تاڭى» فيلمىنىڭ ءتۇسىرىلىم الاڭىندا بولدى، دەپ حابارلايدى قازاقپارات.

«ءتۇسىرىلىم الاڭىندا بار كۇشىن سالىپ جۇمىس جاساپ جاتقان بارلىق ءتۇسىرۋ توبىنا ەرەكشە العىسىمدى ءبىلدىرىپ، سىزدەرگە ارتىپ وتىرعان ءۇمىتىمىز زور ەكەنىن جەتكىزگىم كەلەدى. دەندەرىڭىزگە ساۋلىق، ەڭبەكتەرىڭىزگە ساتتىلىك تىلەيمىن»، - دەدى اقتوتى رايىمقۇلوۆا.

ش. ايمانوۆ اتىنداعى «قازاق فيلم» ا ق پرەزيدەنتى اقان ساتايەۆتىڭ ايتۋىنشا، ءتۇسىرىلىم جوسپار بويىنشا وتۋدە.

«تۇسىرىلىمدەر ويداعىداي ءجۇرىپ جاتىر، جۇمىستىڭ جارتىسى اياقتالدى. بۇگىن ءتۇسىرىلىمنىڭ 41-كۇنى، ءبىز شەشۋشى ءارى قيىن ساحنالاردىڭ ءبىرىن تۇسىرەمىز. تۇسىرىلىمگە 300 گە جۋىق ادام قاتىسادى - 56 كاسكادەر، 200 دەن استام شاباندوز بار. جۇمىس جوسپار بويىنشا جۇرۋدە»، - دەدى اقان ساتايەۆ.

سونداي-اق، رەجيسسەر شىلدە ايىنىڭ باسىندا الماتى وبلىسى كەگەن اۋىلىنىڭ ماڭىندا قاسىم حان اۋىلىنىڭ كوشىن تۇسىرەتىنىن، ال كەيىن ءتۇسىرۋ جۇمىستارى ىلە وزەنىنىڭ بويىندا وسى فيلمگە بەيىمدەلگەن «تۇركىستان» دەكوراتسياسىندا جالعاساتىنىن حابارلادى.

«ۇلى دالا تاڭى» تاريحي ءفيلمى قاسىم حاننىڭ ءومىرى، حاندىق بيلىگى مەن قازاق حاندىعىنىڭ گۇلدەنىپ، نىعايۋى جولىنداعى كۇرەسى تۋرالى باياندايدى. كينوتۋىندىنى قر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاق فيلم» كينوستۋدياسى ءتۇسىرىپ جاتىر.

ەستەرىڭىزگە سالا كەتەيىك، «ۇلى دالا تاڭى» فيلمىنىڭ ءتۇسىرىلىمى بيىل اقپان ايىنىڭ سوڭىندا الماتى وبلىسى كوكتال كەنتىنىڭ ماڭىندا باستالدى. جوبانىڭ شىعارماشىلىق ۇجىمى: باس پروديۋسەرى - ءاليا نازاربايەۆا، سەناري اۆتورلارى - بەكبولات شەكەروۆ پەن اقان ساتايەۆ؛ قويۋشى سۋرەتشى - قۋات تلەۋبايەۆ؛ قويۋشى وپەراتورى - حاسان قىدىراليەۆ؛ گريم بويىنشا سۋرەتشىلەر - ليديا وردىنسكايا، بوتاگوز ابدىبايەۆا؛ كوستيۋم بويىنشا سۋرەتشى - دينا بۋكسيكوۆا.

تاريحي جوبانىڭ عىلىمي كەڭەسشىلەرى: تاريحشى، تاريح عىلىمدارىنىڭ دوكتورى، پروفەسسور بەرەكەت كارىبايەۆ؛ فيلوسوفيا جانە ساۋلەت ونەرى دوكتورى الماس وردابايەۆ؛ سۋرەتشى- كەسكىندەمەشى، تاريح عىلىمدارىنىڭ كانديداتى، ەتنوگراف- قارۋ جاساۋشى قاليوللا احمەتجان جانە باسقالار.

فيلمدە ءتۇسىپ جاتقان اكتەرلەر: بەرىك ايتجانوۆ (ەرەسەك قاسىم حان)، دانيار ورازايەۆ (جاس قاسىم حان)، ايدوس ءابدىقادىروۆ (جاس بۇرىندىق حان)، ەرىك جولجاقسىنوۆ (ەرەسەك بۇرىندىق حان)، نۇرلان ءالىمجانوۆ (مۇحاممەد شايباني)، التىناي نوگەربەك (جاس جاحان بەگىم)، شامشاگۇل مەڭدياروۆا (قارت جاحان بەگىم)، تۇڭعىشباي جامانقۇلوۆ (ەرەسەك ءالي راشيد)، قۋانىش قۇدايبەرگەن (جاس ءالي راشيد) جانە تاعى باسقالارى.