اتىراۋ وبلىسىندا ادام ازاپتادى دەپ كۇدىكتەلگەن پوليتسەيلەر ۇستالدى

اتىراۋ. قازاقپارات - اتىراۋ وبلىسىندا ادام ازاپتادى دەپ كۇدىككە ىلىنگەن پوليتسەيلەر ۇستالدى، دەپ حابارلايدى قازاقپارات.

جىلىوي اۋداندىق ءبولىمىنىڭ 26 جاستاعى ەكى جەدەل ۋاكىلىنىڭ ۇستالۋىن اتىراۋ وبلىسى بويىنشا سىبايلاس جەمقورلىققا قارسى قىزمەت قىزمەتكەرلەرى جۇرگىزدى. ولار ۇرلىق جاسادى دەگەن كۇدىكپەن ۇستالعان قۇلسارى قالاسىنىڭ تۇرعىنىن كۇشپەن مويىنداتقان.

جاۋاپ الۋ كەزىندە سوققىعا جىعىلعان ەر ادام سىبايلاس جەمقورلىققا قارسى قىزمەتكە ارىزدانعان. اتىراۋ وبلىستىق پوليتسيا دەپارتامەنتى ەكى پوليتسەيدىڭ ۇستالعانىن راستادى.

قازىرگى ۋاقىتتا قىلمىستىق كودەكستىڭ ەكى بابى بويىنشا، 146-باپتىڭ 2-بولىگى 1-تارماعى (ادامدار توبىنىڭ الدىن الا ءسوز بايلاسۋى بويىنشا جاسالعان ازاپتاۋلار) جانە 362-باپ 4-بولىگى 1، 3-تارماقتارى (پايدا الۋ ماقساتىندا كۇش قولدانىپ نەمەسە ونى قولدانامىن دەپ قورقىتىپ بيلىكتى نەمەسە لاۋازىمدى وكىلەتتىگىن اسىرا پايدالانۋ) بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتقانىن حابارلادى. ۇستالعاندار ۋاقىتشا ۇستاۋ يزولياتورىنا قامالدى.