شىعىس قازاقستاندا ءىرى قارا قىرىلۋدا: مالشىلار دابىل قاقتى

وسكەمەن. قازاقپارات - شىعىس قازاقستان وبلىسى زايسان اۋدانىنا قاراستى بىرنەشە ەلدى مەكەندە ورنالاسقان شارۋا قوجالىق يەلەرى ءىرى قارانىڭ قىرىلىپ جاتقانىن ايتۋدا، دەپ حابارلايدى قازاقپارات ءتىلشىسى.

جەرگىلىكتى شارۋا قوجالىق يەلەرىنىڭ ايتۋىنشا، بۇل جاعداي ءساۋىر ايىنىڭ سوڭىنا قاراي باستالعان. شىلىكتى، جالشي، قاراساي اۋىلدارىندا مال شىعىنى از ەمەس.

«مەندە 150 باستان استام قوزى قىرىلدى. اۋىلدا ءىرى قارا دا ءولىپ جاتىر. اۋرۋ بەلگىلەرى: ۇساق مال الدىڭعى ەكى تىزەسىنەن كىبىرتىكتەپ اقسايدى. اۋىز جانە مۇرىن قۋىستارىنىڭ شىرىشتى قاباتتارى جارالانىپ، تىنىسى تارىلادى. كەيىن ىستىعى كوتەرىلىپ، وكپەسىن سوعىپ ولەدى، - دەيدى «نۇرداۋلەت» شارۋا قوجالىعىنىڭ يەسى ايبولات لەكەروۆ.

وبلىستاعى ۆەتەرينارلار العاشىندا قوزى مەن بۇزاۋ قىستان كوتەرەم شىققاندىقتان اشتان ءولىپ جاتقانىن ايتقان ەدى.

«ەشقانداي جۇقپالى اۋرۋ جوق. اۋىلدىق وكرۋگتەگى بارلىق مال قىستان كوتەرەم شىققان. 25-28 -ءساۋىر ارالىعىندا كۇن سۋىتىپ، جاۋىن جاۋدى. وسىعان بايلانىستى يممۋنيتەتتەرى السىرەگەن مال قولايسىز اۋا رايى سالدارىنان ءولىپ جاتىر، - دەگەن بولاتىن سول كەزدە شقو ۆەتەريناريا باسقارماسى باسشىسىنىڭ ورىنباسارى ەرتاي باتحولدين.

قازىرگى ۋاقىتتا ساراپتاما ناتيجەسى دە شىعىپ قويعان. سونىڭ قورىتىندىسى بويىنشا مالدىڭ «اناەروبتى ينتەر تاكسين» دەگەن ينفەكسيادان ولگەنى انىقتالىپ وتىر. الايدا مال يەلەرى ءالى كۇنگە دەيىن نە سەبەپتى كارانتين جاريالانباعانىن تۇسىنبەيتىندىكتەرىن ايتۋدا. ايبولات لەكەروۆتىڭ سوزىنشە، جەرگىلىكتى بيلىك مال شىعىنىن ازايتىپ كورسەتكىسى كەلەدى.

«وتكەن اپتادان باستاپ ءىرى قارانىڭ دا اۋرۋ جۇقتىرۋ فاكتىلەرى تىركەلگەن. قازىرگى ۋاقىتتا ۆەتەرينارلار وسىعان بايلانىستى ءتيىستى شارالاردى قابىلداۋدا. الايدا ءبىزدىڭ ماماندار ءىرى قارانىڭ قىرىلۋ فاكتىسىن كورگەن جوق»، - دەيدى ق ر ا ش م ۆەتەريناريالىق باقىلاۋ جانە قاداعالاۋ كوميتەتىنىڭ شىعىس قازاقستان وبلىستىق اۋماقتىق ينسپەكتسياسى باسشىسىنىڭ مىندەتىن اتقارۋشى كادەس شەلەكەنوۆ.

اۆتور: تالعاتجان مۇحامەتبەك ۇلى