دۋبايدا قازاقستاندىق ستارتاپتىڭ كەڭسەسى اشىلماق
بۇل تۋرالى «Astana Hub» حالىقارالىق IT ستارتاپتار تەحنوپاركىنىڭ PR ديرەكتورى مارات شاكەن ءمالىم ەتتى، دەپ حابارلايدى قازاقپارات ءتىلشىسى.
«INUI ستارتاپى - كومپيۋتەرلىك ويىنداردىڭ ءادىل ءوتۋىن قاداعالايتىن قۇرال. ياعني بۇل ستارتاپتىڭ كومەگى ارقىلى گەيمەرلەردىڭ ادىلەتتى ويناۋىن باقىلاۋعا بولادى. مىسالى، سپورتتا «دوپينگ» دەگەن تۇسىنىك بار، وسى ورايدا INUI ستارتاپىن كيبەرسپورتتاعى دوپينگپەن كۇرەسۋدىڭ وڭ شەشىمى دەسەك بولادى. ستارتاپ 2 جىل بويى جۇزەگە اسىپ كەلەدى جانە ول حالىقارالىق دەڭگەيدە مويىندالىپ ۇلگەردى. وعان دالەل - جوبا بۇگىندە كيبەرسپورت كەڭىنەن دامىعان وڭتۇستىك كورەيا جانە شىعىس ەۋروپا ەلدەرىندە ۇسىنىلعان»، - دەدى مارات شاكەن.
اتالعان IT جوبا Astana Hub ستارتاپتار تەحنوپاركىنىڭ تولىقتاي ءبىر قاباتىندا ورنالاسقان.
«قازىرگى ۋاقىتتا INUI ستارتاپىنىڭ دۋباي قالاسىندا كەڭسەسىن اشۋ ماسەلەسى قارالىپ جاتىر. سەبەبى بۇگىندە دۋباي - الەمدەگى كيبەرسپورت جوعارى قارقىنمەن دامىپ كەلە جاتقان قالالاردىڭ ءبىرى. ۇيىمداستىرۋشىلاردىڭ ايتۋىنشا، جاڭا كەڭسە الداعى شىلدە ايىندا اشىلماق. ودان بولەك، ءبىز ءوز تاراپىمىزدان IT سالاسىندا تىڭ يدەياسى بار ستارتاپشىلارعا تەگىن الاڭ مەن قاجەتتى جابدىقتاردى ۇسىنا الامىز. جانە يدەيا اۆتورلارىن ينۆەستورلارمەن تىكەلەي بايلانىس ورناتۋىنا مۇمكىندىك جاسايمىز. ياعني، ءوز يدەياسىن ىسكە اسىرامىن دەگەن ادامعا جول اشىق. بىزدە ينۆەستورلار كۇنى دەگەن ارنايى شارا بار، وندا ۇزدىك دەگەن ستارتاپ جوبالاردى قولداۋ كورسەتۋگە دايىن ينۆەستورلاردىڭ نازارىنا ۇسىنامىز. سول ارقىلى جوبا قارجىلاندىرىلادى»، - دەيدى ول.
ونىڭ ايتۋىنشا، ەلورداداعى ستارتاپتار تەحنوپاركى 502 حالىقارالىق IT كومپانيامەن ءوزارا تىعىز بايلانىستا جۇمىس ىستەيدى.
