«سالەم، ەلوردا!» ونەر شەرۋى مارەسىنە جەتتى

نۇر- سۇلتان. قازاقپارات - «سالەم، ەلوردا!» Ⅱ رەسپۋبليكالىق ونەر شەرۋى ءوز مارەسىنە جەتتى.

ق ر ۇلتتىق كىتاپحاناسىندا وتكەن وتىرىستا ونەر شەرۋىنىڭ جەتىستىكتەرى قورىتىندىلاندى، دەپ حابارلايدى قازاقپارات.

جيىندا ۆيتسە-مينيستر نۇرعيسا داۋەشوۆ وڭىرلەردىڭ ءوزارا قارىم-قاتىناسىن ارتتىرا تۇسەتىن «سالەم، ەلوردا» سىندى رەسپۋبليكالىق شارالاردىڭ اۋقىمىن كەڭەيتىپ، حالىقارالىق دەڭگەيگە جەتكىزۋ قاجەتتىگىن اتاپ ءوتتى.

«جوبا اياسىندا وڭىرلەردەن كەلگەن مادەنيەت قىزمەتكەرلەرى ءوزارا تاجىريبە الماسىپ، شەبەرلىكتەرىن شىڭدادى. بۇل شارالار ەلىمىزدىڭ تۇپكىر-تۇپكىرىنەن جينالعان ارىپتەستەرىمىز ءۇشىن مۇمكىندىكتەر الاڭىنا اينالىپ، ولاردىڭ رۋحاني تولىسۋىنا سەپتىگىن تيگىزدى»، - دەيدى ۆيتسە-مينيستر.

ق ر مادەنيەت جانە سپورت مينيسترلىگىنىڭ باستاماسىمەن جۇزەگە اسىرىلعان «سالەم، ەلوردا!» ونەر شەرۋى بيىل وفلاين فورماتتا الماتى وبلىسى مەن الماتى قالاسىنداعى ونەر ۇيىمدارىندا ءوتتى.

فەستيۆالدىڭ ماقساتى - وڭىرلەردىڭ ونەرى مەن مادەني جەتىستىكتەرىن كەڭىنەن ناسيحاتتاپ، وزىق ۇلگىدەگى ورىنداۋشىلاردى دارىپتەۋ. سونىمەن بىرگە، ونەر شەرۋى اياسىندا ۇلتتىق قۇندىلىقتار ۇلىقتالىپ، ەل تاۋەلسىزدىگىنىڭ 30 جانە جامبىل جابايەۆتىڭ 175 جىلدىعى سەكىلدى بيىل رەسپۋبليكالىق ماڭىزى بار مەرەيتويلار مەن جەرگىلىكتى اتاۋلى داتالار قامتىلدى. جوبانى «قازاق كونسەرت» مەملەكەتتىك كونسەرت ۇيىمى» جانىنداعى «رەسپۋبليكالىق كونسەرتتىك-گاسترولدىك قىزمەت ورتالىعى» ۇيلەستىرۋدە.

وسى ورايدا قازاق كونسەرت باسشىسى جەڭىس سەيدۋللا ۇلى ءوز سوزىندە وسىنداي ءىرى جوبالاردى تەك ۇلكەن قالالاردا عانا ەمەس، وڭىرلىك مادەنيەت ۇيىمدارىندا دا وتكىزۋ ماڭىزدى ەكەنىن ايتتى.

«بيىلعى «سالەم، ەلوردا!» ونەر شەرۋىنە 20 وڭىرلىك مادەنيەت ۇيىمى قاتىستى. جوبا بارىسىندا ارىپتەستەرىمىزگە ءتۇرلى باعىتتاعى كاسىبي شەبەرلىك سىنىپتارى، تانىمدىق ءمانى زور ءىس-شارالار مەن وزىق ۇلگىدەگى كونسەرتتىك باعدارلامالار ۇسىنىلدى.

ونەر شەرۋى اياسىندا 22 شارا، ونىڭ ىشىندە 9 ماستەر-كلاسس، سەمينار-ترەنينگتەر مەن پراكتيكۋم ساباقتار ءوتتى. شەبەرلىك سىنىپتارىندا مادەنيەت سالاسىنداعى مەنەدجمەنت، مۋزىكالىق تەاترلارداعى رەجيسسۋرانىڭ ەرەكشەلىگى، دىبىس جانە جارىق وپەراتورلارىنىڭ قىزمەتى، HR ماسەلەلەرى سىندى تاقىرىپتار قامتىلدى.

ونەر شەرۋى ەندى جىل سوڭىندا تاۋەلسىزدىكتىڭ 30 جىلدىق مەرەيتويىنا وراي نۇر-سۇلتان قالاسىندا وتەتىن گالا-كونسەرتپەن اياقتالادى»، - دەپ اتاپ ءوتتى جەڭىس سەيدۋللا ۇلى.

«سالەم، ەلوردا!» Ⅱ رەسپۋبليكالىق ونەر شەرۋى ەسترادا جۇلدىزدارى مەن ءوڭىر ونەرپازدارىنىڭ قاتىسۋىمەن وتكەن «اسقاقتا، ارمانداردىڭ الاتاۋى!» اتتى گالا-كونسەرتپەن اياقتالدى.