نۇر-سۇلتاندا حالىقارالىق كورمە ورتالىعى اشىلدى
«بۇل جەر «استانا ەكسپو -2017» كورمەسى كەزىندە قويما بولعان. كەيىن قويمانى ءتيىمدى پايدالانۋ ماقساتىندا ويلاستىرا كەلە، كورمە ورتالىعىن اشۋ تۋرالى شەشىم قابىلداندى. بۇل ورتالىقتا كىشىگىرىم عانا ەمەس، كەڭ اۋقىمدى حالىقارالىق دەڭگەيدەگى كورمەلەردى دە ۇيىمداستىرۋ مۇمكىندىگى بار. وسى سەكىلدى كورمە ورتالىعى قازان قالاسىندا بار جانە تاشكەنتتە ەندى سالىنىپ جاتىر، ءبىراق ونىڭ فورماتى باسقا. كورمە ورتالىعىنىڭ تاعى ءبىر ەرەكشەلىگى - كەڭدىگى. ياعني كەز كەلگەن فورماتتاعى شارانى ۇيىمداستىرۋعا ىڭعايلى. مىسالى، كەشەدەن باستاپ «Automechanika Astana 2021» اتتى حالىقارالىق اۆتوموبيلدەر كورمەسى ءوتىپ جاتىر»، - دەدى «QazExpoCongress» ۇلتتىق كومپانياسى ا ق باسقارما ءتوراعاسى اللەن شايجۇنىسوۆ ب ا ق وكىلدەرىنە ارنالعان باسپا ءسوز تۋرىندا.
كورمە ورتالىعىنىڭ جالپى اۋماعى - 13 مىڭ شارتى مەتر. «كورمە ورتالىعى وتكەن جىلدىڭ قىركۇيەك ايىندا ىسكە قوسىلدى، دەگەنمەن پاندەمياعا بايلانىستى بۇعان دەيىن قانداي دا ءبىر ءىس-شارا وتكىزۋ مۇمكىن بولمادى. ەندى عانا العاش شارا ءوتىپ جاتىر. ودان بولەك، الداعى ۋاقىتقا جوسپارلانعان ءىس-شارالار جوسپارى بار، دەگەنمەن ونىڭ ءوتۋ-وتپەۋى ەلدەگى پاندەميالىق جاعدايعا بايلانىستى»، - دەيدى ول.
ايتا كەتسەك، اتالعان حالىقارالىق كورمە ورتالىعىندا Automechanica Astana جانە Futuroad Expo Astana حالىقارالىق كورمەسى اشىلدى. كورمە 26- ماۋسىمعا دەيىن جالعاسادى. بۇعان دەيىن ەلورداداعى EXPO ىسكەرلىك ورتالىعى اۋماعىندا «سيفرلىق ۇكىمەت» كەڭسەسى اشىلاتىنىن حابارلاعان بولاتىنبىز.
