الماتىدا شەكتەۋ شارالارى مىندەتتى تۇردە قابىلدانادى - ساعىنتايەۆ
«لوكداۋن بولا قويمايتىن شىعار. ءبىراق شەكتەۋ شارالارى مىندەتتى تۇردە قابىلدانادى. قالالىق دەپارتامەنت قازىر قاۋلى جوباسىن دايىنداپ جاتىر. سانيتاريالىق- ەپيدەميولوگيالىق قىزمەت كوميتەتىنىڭ شەشىمىن كۇتىپ وتىرمىز. كوميتەتتىڭ قاۋلىسى شىققاننان كەيىن قالالىق دەپارتامەنتتىڭ قاۋلىسى دا جاريالانادى. ىندەت جىلدام تاراپ جاتقانىن كورىپ وتىرمىز. سوندىقتان ءبارى تۇسىنىستىكپەن قارايدى دەپ ويلايمىن. بۇل جەردە ءبىرىنشى كەزەكتە ۆاكتسينالاۋدى كۇشەيتۋ كەرەك. باسقا امالى جوق. الماتىلىقتاردى، بۇكىل قازاقستاندىقتاردى ەكپەنى بەلسەندى الۋعا شاقىرامىز»، - دەدى باقىتجان ساعىنتايەۆ ورتالىق كوممۋنيكاتسيالار قىزمەتىندە.
بۇعان دەيىن ب. ساعىنتايەۆ قالا جاقىن كۇندەرى قايتادان «قىزىل» ايماققا ءوتۋى مۇمكىن ەكەنىن ايتقان بولاتىن.
«جوسپارلى تۇردە قابىلداناتىن ناۋقاستاردى قابىلداۋ قازىر توقتاتىلدى. ءبىر اپتا بويىندا باقىلايمىز. ەگەر وسىلاي جالعاسا بەرەتىن بولسا، وندا ءبىزدىڭ جوبامىز بويىنشا قازىر «سارى» ايماقتا تۇرساق، قىزىل ايماققا ءوتۋ قاۋپىمىز بار. ءۇندىستاندىق شتامم سوعان الىپ كەلە جاتىر»، - دەدى باقىتجان ساعىنتايەۆ.
اۆتور: ەسىمجان ناقتىباي
