الماتى قايتادان «قىزىل» ايماققا ءوتۋى مۇمكىن - قالا اكىمى

نۇر-سۇلتان. قازاقپارات - الماتى قالاسى ەپيدەميولوگيالىق جاعدايعا بايلانىستى «سارى» ايماقتان «قىزىل» ايماققا ءوتۋى مۇمكىن.

بۇل تۋرالى قالا اكىمى باقىتجان ساعىنتايەۆ ورتالىق كوممۋنيكاتسيالار قىزمەتىندە ايتتى، دەپ حابارلايدى قازاقپارات ءتىلشىسى.

«23-كۇنگى رەپوردۋكتيۆتىك ولشەم 1,12-گە جەتىپ وتىر. ايدىڭ باسىندا بۇل كورسەتكىش 1-دەن تومەن بولاتىن. مامىر ايىندا بىزدە 9939 ناۋقاس تىركەلسە، بۇگىندە 3346 بولدى. كۇندەلىكتى وزگەرىس كوبەيىپ كەلە جاتىر. وسىعان بايلانىستى قايتادان ينفەكسيالىق جاعدايعا جىلدام كوشۋ ءۇشىن قالاداعى 3 كوپسالالى اۋرۋحانانى كوروناۆيرۋسكە بايلانىستى ينفەكتسيالىق اۋرۋحاناعا اۋىستىرۋعا جۇمىس جۇرگىزۋدى باستادىق»، - دەدى قالا اكىمى.

شاھار باسشىسى اتالعان ەمدەۋ مەكەمەلەرىندە قازىر جوسپارلى قابىلداۋ توقتاتىلعانىن اتادى. «جوسپارلى تۇردە قابىلداناتىن ناۋقاستاردى قابىلداۋ قازىر توقتاتىلدى. ءبىر اپتا بويىندا باقىلايمىز. ەگەر وسىلاي جالعاسا بەرەتىن بولسا، وندا ءبىزدىڭ جوبامىز بويىنشا قازىر «سارى» ايماقتا تۇرساق، قىزىل ايماققا ءوتۋ قاۋپىمىز بار. ءۇندىستاندىق شتامم سوعان الىپ كەلە جاتىر»، - دەدى باقىتجان ساعىنتايەۆ.