«قوزى كورپەش - بايان سۇلۋ» العاش بالەت تۇرىندە ساحنالانادى

نۇر- سۇلتان. قازاقپارات - ەلوردادا قازاق ادەبيەتىندەگى تانىمال تۋىندىلاردىڭ ءبىرى «قوزى كورپەش - بايان سۇلۋ» ليرو- ەپوستىق جىرى العاش رەت ساحنادا بالەت تۇرىندە قويىلادى، دەپ حابارلايدى قازاقپارات ءتىلشىسى.

«قويىلىمعا 3 اي بويى دايىندالىپ كەلەمىز. «قوزى كورپەش - بايان سۇلۋ» ليرو- ەپوستىق جىرى بۇعان دەيىن ساحنالانعانىمەن بالەت تۇرىندە العاش رەت قويىلعالى وتىر. سوندىقتان جاۋاپكەرشىلىك مول، دايىندىق جۇمىستارى ءالى دە ءجۇرىپ جاتىر. كورەرمەندەردىڭ كوڭىلىنەن شىعۋ ءۇشىن بار كۇشىمىزدى سالىپ جاتىرمىز. ونىڭ ۇستىنە اتالعان شىعارمانى تەك قازاقستاندا ەمەس، الداعى ۋاقىتتا شەتەلدىك كورەرمەندەردىڭ نازارىنا دا ۇسىناتىن بولامىز. قويىلىمنىڭ قانداي دەڭگەيدە ساحنالانعانىن كورەرمەندەردەن ەستىگىمىز كەلەدى»، - دەدى «استانا بالەت» تەاترىنىڭ ديرەكتورى الەكساندر سوۆوستيانوۆ.

بالەت تۇرىندەگى «قوزى كورپەش - بايان سۇلۋ» ليرو- ەپوستىق جىرى ەل تاۋەلسىزدىگىنىڭ 30 جىلدىق مەرەيتويى مەن ەلوردا كۇنىنە وراي ۇيىمداستىرىلعالى وتىر.

«نەگە قوزى كورپەش - بايان سۇلۋ» دەگەن سۇراققا كەلسەك، بۇل ماحاببات پەن سۇلۋلىق، نازىك سەزىم مەن ادامنىڭ ءبىر- بىرىنە دەگەن ادالدىعىن بەينەلەپ كورسەتەتىن شىعارما. سونىمەن قاتار، بۇل جىردا قاستاندىق جاساۋ، كەك الۋ بار بۇل دا ومىردە بار نارسە. تاعى ءبىر سەبەپ قازاقستاندا ۇلتتىق بالەت از. وسى ورايدا وتاندىق بالەتكە ءمان بەرۋدى ءجون سانادىق»، - دەدى «استانا بالەت» تەاترىنىڭ كوركەمدىك جەتەكشىسى نۇرلان قانەتوۆ.

«استانا بالەت» تەاترىندا ساحنالاناتىن قويىلىمدى قويۋشى- بالەتمەيستەر رەتىندە رەسەيدىڭ ەڭبەگى سىڭگەن ونەر قايراتكەرى گەورگيي كوۆتۋن ارنايى شاقىرىلعان. ايتا كەتسەك، «قوزى كورپەش - بايان سۇلۋ» بالەتىنىڭ مۋزىكاسىن ق ر مادەنيەت جانە سپورت ءمينيسترى اقتوتى رايىمقۇلوۆا جازعان. قويىلىم 2-3-شىلدە كۇندەرى (ساعات 19:30 جانە 18:00-دە) ەلورداداعى «استانا بالەت» تەاترىندا ساحنالانادى.