ۆيتسە-پرەمەر: قازاقستاندا قولدانىلاتىن بارلىق ۆاكسينا ءتيىمدى ءارى قاۋىپسىز
بۇل تۋرالى ق ر پرەمەر-ءمينيسترىنىڭ ورىنباسارى ەرالى توعجانوۆ ايتتى، دەپ حابارلايدى قازاقپارات ءتىلشىسى.
«قازاقستاندا قولدانىلاتىن بارلىق ۆاكسينا ءتيىمدى ءارى قاۋىپسىز ەكەندىگىن مالىمدەيمىز. ءسوز جوق، قازاقستاندا ەپيدەميولوگيالىق جاعداي تۇراقتاندى. نۇر-سۇلتان قالاسىندا ءبىراز ماسەلە بار. كەشە عانا دەنساۋلىق ساقتاۋ مينيسترىمەن وتىرىس وتكىزىپ، ءبىرقاتار ماسەلەلەنى تالقىلادىق. ءبىراق، جاعداي تۇراقتالدى دەپ قول قۋسىرىپ وتىرۋعا حاقىمىز جوق»، - دەدى ۇكىمەت باسشىسىنىڭ ورىنباسارى ورتالىق كوممۋنيكاتسيالار قىزمەتىندەگى بريفينگىدە.
ەرالى توعجانوۆ ساقتىق شارالارىن قاتاڭ ساقتاۋ قاجەتتىگىن دە باسا ايتتى.
«ماسكا كيۋ، الەۋمەتتىك اراقاشىقتىقتى ساقتاۋ جانە باسقا دا ساقتىق ءىس-شارالارىن قولدانۋ كۇندەلىكتى ادەتىمىزگە اينالۋى كەرەك. ۆاكسينا العان كۇننىڭ وزىندە وسىنداي ساقتىق ءىس-شارالارىن قولدانعانىمىز بۇگىندە ارتىق ەتپەيدى»، - دەدى ول.
