الماتىدا ءۇندى شتامىنىڭ پايدا بولۋىنا بايلانىستى رەۆاكسيناتسيا قاجەت پە

الماتى. قازاقپارات - الماتى قالاسى سانيتاريالىق- ەپيدەميولوگيالىق باقىلاۋ دەپارتامەنتىنىڭ باسشىسى، قالانىڭ باس مەملەكەتتىك سانيتار دارىگەرى جانداربەك بەكشين «ءۇندى» شتامىنىڭ پايدا بولۋىنا بايلانىستى رەۆاكسيناتسيا(قايتالاپ ەگۋ) قاجەت پە، جوق پا؟» دەگەن ساۋالعا جاۋاپ بەردى، دەپ حابارلايدى قازاقپارات ءتىلشىسى.

«رەۆاكسيناتسيا ماسەلەسى كوتەرىلگەن جوق. ويتكەنى «سپۋتنيك V» ۆاكسيناسى بارلىق بەلگىلى مۋتاتسيالانعان شتامداردى ينفەكسيادان قورعايدى. بۇل تۋرالى ۆاكسينا ازىرلەۋشىلەردىڭ رەسمي مالىمدەسى بار. سونىمەن قاتار QazVac ۆاكسيناسى ءۇندى شتامىنا توتەپ بەرە الادى»، - دەدى جانداربەك بەكشين بريفينگتە.

ونىڭ ايتۋىنشا، الماتىدا كوروناۆيرۋس ينفەكسياسىن قايتا جۇقتىرۋدىڭ 32 جاعدايى تىركەلگەن. 360 مىڭنان استام ادام ۆاكسينا الدى.

«قالادا ينفەكسيانى قايتا جۇقتىرۋدىڭ 32 جاعدايى تىركەلدى. «سپۋتنيك V» ۆاكسيناسىنىڭ تيىمدىلىگى %92 كورسەتتى. يممۋنيتەتتىڭ قالىپتاسۋى ادامنىڭ اعزاسىنا بايلانىستى. بىرىندە يممۋنيتەت بار، ەندى بىرىندە ءالسىز»، - دەپ قوستى ول.

ەسكە سالا كەتەيىك، بۇعان دەيىن جانداربەك بەكشين الماتىدا 37 جاستاعى ءۇي شارۋاسىنداعى ايەلدەن كوروناۆيرۋستىڭ ءۇندى شتامى تابىلعانىن ايتقان بولاتىن.