تۇركىستاندى سالۋعا قانشا قارجى ءبولىندى

نۇر-سۇلتان. قازاقپارات - تۇركىستان وبلىسىنىڭ اكىمى ءومىرزاق شوكەيەۆ ءوڭىر ورتالىعىنىڭ قۇرىلىسىنا بولىنگەن قارجى سوماسىن اتادى، دەپ حابارلايدى قازاقپارات ءتىلشىسى.

«تۇركىستاندى ارنايى قارجىلاندىرۋعا قاتىستى اڭىز وتە كوپ. تولىقتاي العاندا، ءبىز اياقتاعالى وتىرعان ءبىرىنشى كەزەڭگە 445 ميلليارد تەڭگە جۇمسالدى. ونىڭ جارتىسى جەكە ينۆەستيتسيا، ال قالعان بولىگى - بيۋدجەت قاراجاتى. بيۋدجەت قاراجاتىنىڭ بارلىعى «نۇرلى جەر»، «نۇرلى جول»، «اۋىل - ەل بەسىگى» مەملەكەتتىك باعدارلامالارى اياسىندا ءبولىندى. ياعني، بارلىعى دا حالىق سانىنا ساي رەسپۋبليكالىق بيۋدجەتتەن تەڭگەرىمدى ءبولۋ نورماتيۆتەرىنە، قولدانىستاعى مەملەكەتتىك باعدارلامالار اياسىندا بولدى.

ارينە، پرەزيدەنتتىڭ، ۇكىمەتتىڭ تاپسىرماسىمەن جۇزەگە اسىرىلاتىن جەكەلەگەن جوبالار دا بار» ، - دەدى ءومىرزاق شوكەيەۆ ورتالىق كوممۋنيكاتسيالار قىزمەتىنىڭ كوشپەلى بريفينگى بارىسىندا. سونىمەن قاتار ول ەلىمىزدىڭ بارلىق وبلىستارى تۇركىستان قالاسىندا ءبىر- ءبىر نىساننان سالعاندىعىن اتاپ ءوتتى.

«بۇل جەكە ارناۋلى حاتتاماعا ساي جۇزەگە اسىرىلدى. وسىلاردىڭ بارلىعىن ەسكەرەر بولساق، تۇركىستان وبلىسىن قارجىلاندىرۋدا شەكتەن شىققان ەشتەڭە دە جوق»، - دەدى ول.