مەملەكەتتىك بورىش قاۋىپسىز دەڭگەيدە ساقتالادى - قارجى ءمينيسترى
بۇل تۋرالى پارلامەنت سەناتىنىڭ جالپى وتىرىسىندا ق ر ۇكىمەتىنىڭ 2020 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبىن قاراۋ كەزىندە قارجى ءمينيسترى ەرۇلان جاماۋبايەۆ ءمالىم ەتتى، دەپ حابارلايدى قازاقپارات ءتىلشىسى.
«كۆازيمەملەكەتتىك سەكتوردىڭ قىزمەتى تۋرالى ءبىراز سىندار ايتىلدى. وسى باعىتتا مەملەكەتتىڭ ەكونوميكاعا تىكەلەي قاتىسۋىن قىسقارتۋ بويىنشا جۇمىس جالعاسادى جانە جەكەشەلەندىرۋ پروتسەسى كۇشەيتىلەدى. جىل سايىنعى كوتەرىلەتىن ماسەلە - ول كۆازيمەملەكەتتىك سەكتور سۋبەكتىلەرىنىڭ شوتتارىنداعى قالدىقتار. بيۋدجەت زاڭناماسىنا قاجەتتى وزگەرتۋلەر قابىلداندى. بۇل قاراجات سۋبەكتىلەردىڭ ءتيىستى ورگاندارىنىڭ شەشىمىمەن بەلگىلەنگەن ءتارتىپ بويىنشا جاڭا جوبالارعا باعىتتالادى نەمەسە بيۋدجەتكە قايتارىلادى» - دەدى ە. جاماۋبايەۆ.
ونىڭ ايتۋىنشا، اتالعان ەسەپتى قاراۋ كەزىندە مەملەكەتتىك بورىشتىڭ وسۋىنە ەرەكشە نازار اۋدارىلدى.
«راسىندا، داعدارىسقا قارسى شارالاردى قارجىلاندىرۋ ءۇشىن 2020 -جىلى ءبىز بيۋدجەتتىڭ تاپشىلىعىن جانە قارىزداردى ۇلعايتۋعا ءماجبۇر بولدىق. الداعى ۋاقىتتا بىرتىندەپ بيۋدجەت تاپشىلىعىن تومەندەتۋ جوسپارلانۋدا. بۇل جاڭادان قارىز الۋ قارقىنىن دا ازايتادى. ۆاليۋتالىق تاۋەكەلدەردى بولدىرماۋ جانە قارىز قۇرالدارىنىڭ جەرگىلىكتى نارىعىن دامىتۋ ءۇشىن بارىنشا ىشكى نارىقتىڭ وتىمدىلىگى پايدالانىلاتىن بولادى. مەملەكەتتىك بورىش قاۋىپسىز دەڭگەيدە ساقتالادى جانە ول بەلگىلەنگەن ليميتتەن اسىپ كەتپەيدى»- دەدى مينيستر.