قىتاي وربيتالىق ستانسيا قۇرىلىسىن جۇرگىزۋگە ءبىرىنشى باسقارىلاتىن عارىش كەمەسىن ۇشىردى

كەمەنىڭ ۇشىرىلۋىنىڭ تىكەلەي ترانسلياتسياسىن قىتايدىڭ ورتالىق تەلەارناسى جاسادى، دەپ حابارلايدى قازاقپاراتتىڭ مەنشىكتى ءتىلشىسى.

اپپاراتتى وربيتاعا شىعارۋ ءۇشىن CZ-2F تاسىمالداۋشى زىمىرانى قولدانىلدى.

«شەنچجوۋ-12- ءنىڭ» ۇشىرىلۋى سوڭعى بەس جىلدا العاشقى رەت بولىپ وتىر. سوڭعى باسقارىلاتىن عارىش ميسسياسى 2016 -جىلى جۇزەگە اسىرىلعان.

«شەنچجوۋ-12» باسقارىلاتىن عارىش كەمەسى «جيۋتسيۋان» عارىش ايلاعىنان 17- ماۋسىم كۇنى جەرگىلىكتى ۋاقىت بويىنشا ساعات 09:22-دە ۇشىرىلدى. ميسسيانىڭ باستى ماقساتى - قىتايلىق عارىش ستانسياسىنىڭ وربيتاداعى جۇمىستارىنا قىزمەت كورسەتىپ، تەستىلەۋ وتكىزۋ.

وربيتاعا شىققانان كەيىن عارىش كەمەسى اۆتوماتتى تۇردە «تيانحە» عارىش ستانسياسىنىڭ نەگىزگى مودۋلىنە جاقىنداپ، ونىمەن تۇيىسەدى. ناتيجەسىندە وسى مودۋلمەن جانە «تيانچجوۋ-2» جۇك كەمەسىمەن وربيتالىق كەشەن قۇرادى. ودان كەيىن «شەنچجوۋ-12» كەمەسىنىڭ بورتىنداعى عارىشكەرلەر نەگىزگى مودۋلگە اۋىسىپ، وربيتادا ءۇش اي مەرزىمگە قالادى. عارىش ايلاعىنا ارنالعان «تيانحە» بازالىق مودۋلى عارىشقا وسى جىلدىڭ ساۋىرىندە، «تيانچجوۋ-2» جۇك كەمەسى مامىرىندا جىبەرىلگەن.

اۆتور: ءبيبىحان سەرىكوۆا