بۋرابايداعى ابىلاي حان الاڭىندا «سامۇرىق قۇسىمەن» ۇشۋعا بولادى

«بۋراباي دامۋ» جاۋاپكەرشىلىگى شەكتەۋلى سەرىكتەستىگىندەگى اتالمىش نىساندى قۇراستىرۋشىلاردىڭ ايتۋىنشا، مۇنداي مۋلتيمەديالىق ينتەراكتيۆتى كەشەننىڭ قازاقستاندا بالاماسى جوق.

«قازىرگى تاڭدا كەشەن ارقىلى ەلىمىزدىڭ جانە حالقىمىزدىڭ تاريحىنا شىنايى ەنۋدى سەزىنۋگە بولادى. جاڭا تەحنولوگيالاردىڭ كومەگىمەن 5D فورماتىندا قىزىقتى ساياحات جاساۋ جانە ەلىمىزدىڭ تاريحىنا ەنۋ مۇمكىندىگى بار»، - دەپ ءبولىستى ماركەتينگ جونىندەگى مەنەدجەر اسەم مۇقىموۆا.

كەشەن بىرنەشە مۋلتيمەديالىق زالدار مەن اتتراكسيونداردان تۇرادى. سولاردىڭ ءبىرى - قازاقستانداعى جالعىز مۋلتيمەديالىق ءومىر اعاشى وسەتىن «ماڭگىلىك ەل». بۇل شەجىرەنىڭ ءبىر ءتۇرى. اۆتورلار مادەنيەتتى جانە ۇلى تاريحىمىزدى ساقتاپ قالۋ ءۇشىن ءاربىر قازاق ءوزىنىڭ شىعۋ تەگىن، ءوز رۋى مەن ءجۇزىن ءبىلۋى ءتيىس دەپ ەسەپتەيدى. «ءومىر اعاشى» ءار قازاقتىڭ رۋ- تايپالىق قۇرامى تۋرالى بارلىق اقپاراتتى كورنەكى تۇردە كورسەتەدى. ول جارىق شوۋى ارقىلى كورسەتىلەدى»، - دەپ تولىقتىردى «بۋراباي دامۋ» جاۋاپكەرشىلىگى شەكتەۋلى سەرىكتەستىگىنىڭ ماماندارى.

سونداي- اق، مۋلتيمەديالىق كەشەنگە كەلۋشىلەر «سامۇرىق قۇسىنىڭ ۇشۋى» اتتراكسيونىندا بولا الادى، وندا «سامۇرىق قۇسىنىڭ» سوڭىنان ەرە وتىرىپ، بارلىعى قازاقستان بويىنشا ۆيرتۋالدى ۇشۋ- ساياحاتتىن جاساي الادى.

«ۇشۋ كەزىندە ءسىز ەلىمىزدىڭ ەڭ ەكزوتيكالىق جەرلەرىنە بارىپ، ونىڭ تابيعاتىمەن، قازاقستاننىڭ قازىناسىن قۇرايتىن كيەلى وبەكتىلەرمەن تانىساسىز. بۇل ءسىزدى كۇتەتىن نارسەنىڭ از عانا بولىگى»، - دەپ قوستى ا. مۇقىموۆا.

بۇگىنگى كۇنى كەشەن جۇمىس كۇندەرى 10:00 - دەن 18:00-گە دەيىن، دەمالىس كۇندەرى-20:00-گە دەيىن. مەنەدجەردىڭ ايتۋىنشا، سەسسيالار ءار جارتى ساعات سايىن وتەدى. ءبىر سەسسياعا 10-12 كەلۋشىگە رۇقسات ەتىلەدى. ۇيىمداستىرۋشىلار جەڭىلدىكتەر دە قاراستىرعان. 6 جاسقا دەيىنگى بالالار، جەتىم بالالار، اتا- اناسىنىڭ قامقورلىعىنسىز قالعان بالالار، جەتىم بالالار مەن اتا - اناسىنىڭ قامقورلىعىنسىز قالعان وقۋشىلار مەن ستۋدەنتتەر، مۇگەدەك بالالار، ۇ و س ارداگەرلەرى، 1,2,3 توپتاعى مۇگەدەكتەر، «كۇمىس القا» جانە «التىن القا» يەگەرلەرى كەشەنگە تەگىن بارا الادى.

اۆتور: اسلان وسپانوۆ