پيتەر بۋريان ەۋروپالىق كەڭەس باسشىسىنىڭ قاسىم- جومارت توقايەۆقا حاتىن جەتكىزدى
«ەۋروپالىق كەڭەستىڭ باسشىسى شارل ميشەلدىڭ پرەزيدەنت قاسىم- جومارت توقايەۆقا جولداعان حاتىن الىپ كەلدىم. بۇل حاتتا قازاقستاندا جۇرگىزىلىپ جاتقان رەفورمالارعا باعا بەرىلگەن»، - دەدى پيتەر بۋريان سەيسەنبى كۇنى جۋرناليستەرمەن بولعان كەزدەسۋدە.
ەۋروپالىق كەڭەستىڭ باسشىسى ءوز حاتىندا قازاقستاننىڭ دا، ەۋروپالىق وداقتىڭ دا وركەندەۋ جولىنداعى بىرلەسكەن جۇمىسقا وزگەرىسسىز بەيىلىن بىلدىرەدى.
«وندا ورتاق قۇندىلىقتار نەگىزىندە ىنتىماقتاستىقتى ودان ءارى تەرەڭدەتۋگە بەيىلدىلىگىمىز مالىمدەلەدى. شارل ميشەل كەڭەيتىلگەن سەرىكتەستىك پەن ىنتىماقتاستىق تۋرالى جاڭا كەلىسىم (قازاقستان مەن ە و اراسىنداعى - رەد. ) ءبىزدىڭ قارىم- قاتىناسىمىزدى دامىتۋ ءۇشىن بەرىك نەگىز قۇرعانىن قۋاتتايدى»، - دەپ اتاپ ءوتتى جوعارى دارەجەلى ەۋروپالىق ديپلومات.
«حاتتا قازاقستاننىڭ وڭىرلىك كوشباسشىلىعىنا جانە ەۋروپالىق وداقتىڭ وڭىرلىك سىن- قاتەرلەردى، سونىڭ ىشىندە اۋعانستانداعى قاقتىعىستى رەتتەۋدى بىرلەسىپ شەشۋگە دايىندىعىنا باعا بەرىلگەن»، - دەدى ە و- نىڭ ورتالىق ازيا بويىنشا ارنايى وكىلى.
سپيكەردىڭ ايتۋىنشا، حاتتا ەۋروپالىق كەڭەستىڭ باسشىسى شارل ميشەلدىڭ قازاقستان پرەزيدەنتى قاسىم- جومارت توقايەۆتى بريۋسسەلگە شاقىرۋى دا بار.
ايتا كەتەيىك، ە و- نىڭ ورتالىق ازيا بويىنشا ارنايى وكىلى قازاقستانعا ساپارىنىڭ باعدارلاماسىندا سىرتقى ىستەر ءمينيسترى مۇحتار تىلەۋبەردىمەن، ق ر پرەزيدەنتىنىڭ حالىقارالىق ىنتىماقتاستىق جونىندەگى ارنايى وكىلى ەرجان قازىحانوۆپەن، پارلامەنت دەپۋتاتتارىمەن جانە بيزنەس وكىلدەرىمەن كەزدەسۋلەرى بار.
