قازاقستاندا جاڭا اقپارات اگەنتتىگى قۇرىلدى
الماتى. قازاقپارات - الماتىدا Independ.kz اقپارات اگەنتتىگىنىڭ رەسمي اشىلۋى ءوتتى، دەپ حابارلايدى قازاقپارات ءتىلشىسى.
جاڭا اقپاراتتىق اگەنتتىكتىڭ اۆتورى مەن جاساۋشىسى - «جاستارعا جول» قوعامدىق قورى.
تاۋەلسىز اقپاراتتىق پورتال تولىعىمەن قوردىڭ جانە جاناشىر ازاماتتاردىڭ قارجىسىنا قۇرىلدى. پورتال قوعامىمىزدىڭ دامۋىنا قاتىستى ماڭىزدى ماسەلەلەردى كورسەتۋگە ارنالعان.
اقپارات اگەنتتىگىنىڭ باسىم باعىتتارى ەكولوگيالىق پروبلەمالار، يننوۆاتسيالىق جاسىل تەحنولوگيالاردى ەنگىزۋ، ازاماتتىق قۇقىقتاردى قورعاۋ، كاسىپكەرلەردىڭ قۇقىقتارى جانە ب ۇ ۇ باس اسسامبلەيا كەڭەسى قابىلداعان تۇراقتى دامۋ ماقساتتارىندا كورسەتىلگەن باسقا دا ماسەلەلەردى قامتيدى. كوماندانىڭ تىرەگى - جاستار.
«ءبىزدىڭ تاۋەلسىز پورتالىمىزدىڭ جۇمىسىنداعى نەگىزگى پرينتسيپتەر - بۇل بەيتاراپتىلىق، بەرىلەتىن اقپاراتتىڭ شىن بولۋى. پورتالدىڭ ماڭىزدى مىندەتتەرىنىڭ ءبىرى - مەملەكەت، قوعام جانە بيزنەس اراسىنداعى تەڭ اقپاراتتىق سەرىكتەستىكتى دامىتۋ. ءبىز ۇكىمەتتىڭ ۇندەۋلەرىن، زاڭنامالىق تۇزەتۋلەردى، ماقساتتى باعدارلامالاردى بارىنە قاراپايىم جانە ۇعىنىقتى تىلدە جەتكىزگىمىز كەلەدى جانە سوعان جۇمىس ىستەيمىز. ءبىراق نەگىزگى باعىتتار قوعامنىڭ دامۋى مەن ازاماتتارىمىزدىڭ، ەڭ الدىمەن، جاستاردىڭ ءال-اۋقاتىنا بايلانىستى ماسەلەلەر بولادى، ويتكەنى ءبىزدىڭ «جاستارعا جول» قورى جاستاردىڭ الەۋمەتتىك ماسەلەلەرىمەن اينالىسادى»، - دەدى Independ.kz اگەنتتىگىنىڭ باس رەداكتورى رافاەل گاسانوۆ.
جاڭا اگەنتتىكتى اشىلۋىمەن قازاقستانداعى ب ۇ ۇ جاھاندىق كوممۋنيكاتسيالار دەپارتامەنتىنىڭ وكىلى ۆلاستيميل سامەك، قوعام قايراتكەرى مارياننا گۋرينا جانە قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ەلدوس اباقانوۆ قۇتتىقتادى.
دەپۋتات جاڭا اگەنتتىك جۇمىسىنىڭ «حالىق ۇنىنە قۇلاق اساتىن مەملەكەت» تۇجىرىمداماسىن دامىتۋعا ىقپال ەتۋدەگى ماڭىزدىلىعىن اتاپ ءوتتى.
سونىمەن قاتار، ول اقپاراتتىق الاڭنىڭ مۇمكىندىكتەرىن پايدالانا وتىرىپ، قوعاممەن ديالوگقا بەلسەندى جانە تىكەلەي قاتىسۋعا دايىن ەكەندىگىن جەتكىزدى.
