سەرىك ساپيەۆ بوكستان وتكەن ازيا چەمپيوناتى تۋرالى پىكىر ءبىلدىردى
«بۇگىن بۇل جەرگە جاعىمدى سەبەپپەن جينالىپ وتىرمىز. جانسايا ابدىمالىكتى وسى جەتىستىگىمەن قۇتتىقتايمىن جانە قۇرمەتىمدى بىلدىرگىم كەلەدى. قازاقستان سپورتىنداعى سوڭعى جاڭالىقتار ءبىز ءۇشىن جاعىمدى بولعانىن ايتقىم كەلەدى. بوكستان وتكەن ازيا چەمپيوناتىنان باستاساق، جالپى كوماندالىق ەسەپتە قازاقستان قۇراماسى ءبىرىنشى ورىنعا يە بولدى. ايەلدەر قۇراماسى 8 التىن مەدال جەڭىپ الدى. وكىنىشكە قاراي، ەرلەر قۇراماسىنىڭ ناتيجەسى سونشالىقتى تابىستى بولعان جوق. ءبىراق لايىقتى شەبەرلىك پەن ساپا كورسەتتى دەۋگە بولادى»، - دەدى كوميتەت باسشىسى.
سەرىك ساپيەۆ «رولان گارروس» تۋرنيرىندە قازاقستاننىڭ اتىنان ونەر كورسەتىپ جاتقان تەننيسشىلەردىڭ جەتىستىگىنە دە توقتالدى.
«ەلەنا رىباكينا قازاقستان تاريحىندا العاش رەت الەمنىڭ بۇرىنعى ۇزدىك راكەتكاسى سەرەنا ۋيليامستى جەڭدى. اندرەي گولۋبيەۆ پەن الەكساندر بۋبليك تە اتالعان تۋرنيردىڭ شيرەك فينالىنا ءوتىپ وتىر»، - دەدى ول ورتالىق كوممۋنيكاتسيالار قىزمەتىندە وتكەن بريفينگىدە.
كوميتەت باسشىسى حوككەي قۇراماسىنىڭ توپتىق كەزەڭنىڭ سىن ساعاتىندا مۇمكىندىكتى قولدان جىبەرىپ العانىن دا ەسكە سالدى.
«حوككەيشى جىگىتتەرىمىز الەم چەمپيوناتىنىڭ پلەي-وفف كەزەڭىنە ءبىر اتتام جەردەن قايتقانىن بىلەسىزدەر. دەگەنمەن، بۇل دا ۇلكەن جەتىستىك. سوڭعى جاڭالىق - دزيۋدوشى عۇسمان قىرعىزبايەۆ الەم چەمپيوناتىندا كۇمىس مەدال جەڭىپ الدى. بارلىق سپورتشىلارىمىزدى قۇتتىقتايمىن. ارينە، جانسايا ابدىمالىكتىڭ جەڭىسى ەرەكشە! ءسىز ەرلەر اراسىندا حالىقارالىق گروسسمەيستەر بولدىڭىز. الدا بۇدان دا ۇلكەن جەتىستىكتەرگە جەتىپ، ەلىمىزدىڭ يميدجى ءۇشىن ۇلكەن ناتيجەلەرگە جەتۋىڭىزگە تىلەكتەسپىن»، - دەدى سەرىك ساپيەۆ.
ەسكە سالساق، بوكستان بىرىككەن اراب امىرلىگىنىڭ دۋباي قالاسىندا وتكەن ازيا بىرىنشىلىگىندە قازاقستاننىڭ ەرلەر قۇراماسى بەس كۇمىس مەدال العان بولاتىن.
بۇعان دەيىن حابارلاعانىمىزداي، مەملەكەت باسشىسى قاسىم-جومارت توقايەۆ جانسايا ابدىمالىكتى فيدە گران-پريىندەگى جەڭىسىمەن قۇتتىقتاعان بولاتىن.
ەسكە سالساق، اتالمىش تۋرنيردەگى جەتىستىگى ءۇشىن وتانداسىمىز ەرلەر اراسىنداعى حالىقارالىق گروسسمەيستەر اتانعان ەدى.
