قىرعىز- تاجىك شەكاراسىندا جاعداي قايتادان شيەلەنىستى

نۇر- سۇلتان. قازاقپارات - قىرعىزستان مەن تاجىكستان شەكاراسىندا جاعداي قايتا شيەلەنىسە باستادى. بۇل تۋرالى قىرعىزستاننىڭ ۇلتتىق قاۋىپسىزدىك كوميتەتىنىڭ شەكارا قىزمەتى حابارلادى.

اقپاراتقا سايكەس، تاجىكستان تاراپى قىرعىزستاننىڭ 1 مىڭ شارشى مەتر اۋماعىنا كىرىپ، وش وبلىسىنىڭ چونالاي اۋدانىنداعى ۋنجۋ- بۋلاك مەكەنىندە كونتەينەر قويعان. جانە شەكارا ماڭىنا اسكەرى مەن تەحنيكاسىن شوعىرلاندىرا باستاعان.

قىرعىز شەكاراشىلارى جاعداي ۋشىقپاۋ ءۇشىن كۇش سالعانىمەن تاجىكستان شەكارا وكىلدەرى جاۋاپ بەرمەي جاتقانىن ايتادى. وسىعان بايلانىستى شەكاراداعى جاساقتارىن كۇشەيتىلگەن رەجيمگە كوشىرگەن. جانە ماسەلەنى شەشۋ ءۇشىن ەكى ەل اراسىنداعى شەكارانى بەلگىلەۋ بويىنشا قىرعىز دەلەگاتسياسىنىڭ باسشىسى مەن ۇكىمەت وكىلدەرى وقيعا ورنىنا اتتاندى.

www.24.kz