رامىزدەر كۇنى: الماتىداعى ەڭ ۇلكەن تۋ قاي جەردە ورنالاسقان
قازاقپارات ءتىلشىسى الماتىداعى ەلىمىزدىڭ ەڭ ۇلكەن تۋى قاي جەردە ورنالاسقانىن ءبىلدى. الماتىداعى ەڭ ۇلكەن مەملەكەتتىك تۋ 2019 -جىلى مەدەۋ مۇز ايدىنىنىڭ ماڭىنا ورناتىلدى.
مەملەكەتتىك تۋدىڭ ورناتىلۋى ۇلتتىق باسكەتبول فەدەراتسياسىنىڭ باستاماسىمەن «Nur Otan» پارتياسىنىڭ جانە الماتى قالاسى اكىمدىگىنىڭ قولداۋىمەن جۇزەگە استى. تۋتۇعىردىڭ بيىكتىگى - 40 مەتر. تۋدىڭ ەنى - 7 مەتر، ۇزىندىعى - 14 مەتر.
قالالىق قوعامدىق دامۋ باسقارماسىنىڭ مالىمەتىنشە، قالانىڭ بارلىق مەملەكەتتىك مەكەمەلەرىندە جانە اكىمشىلىك عيماراتتاردا قازاقستان رەسپۋبليكاسىنىڭ مەملەكەتتىك رامىزدەرىن پايدالانۋ ءتارتىبىنىڭ ساقتالۋى بويىنشا مونيتورينگ ۇنەمى جۇرگىزىلىپ وتىرادى. الماتىدا 600 دەن استام مەملەكەتتىك نىسان بار.
«مونيتورينگ ق ر ست 988-2007 مەملەكەتتىك ستاندارتىنىڭ تالاپتارىنا سايكەستىگى بويىنشا جۇزەگە اسىرىلادى. سونىمەن بىرگە مەملەكەتتىك ەلتاڭباداعى «QAZAQSTAN» لاتىن گرافيكاسى تەكسەرىلەدى»، - دەپ جاۋاپ بەردى باسقارماداعىلار.
ايتا كەتەيىك، قازاقستانداعى ەڭ ۇلكەن تۋدىڭ ەنى – 15، ۇزىندىعى - 30 مەتر. ول نۇر- سۇلتان قالاسىندا «اتامەكەن» ەتنومەموريالدى كەشەنىنىڭ اۋماعىنا ورنالاسقان .
