نۇر- سۇلتاندا «شىڭعىس حان» كىتابىنىڭ تۇساۋكەسەرى ءوتتى
كىتاپ اۆتورلارى - مەملەكەت جانە قوعام قايراتكەرى، ساياسي عىلىمدار دوكتورى ەرجان يساقۇلوۆ پەن قازاقستان مۇسىلماندارى ءدىني باسقارماسى عالىمدار كەڭەسىنىڭ مۇشەسى، وڭتۇستىك قازاقستان مەملەكەتتىك ۋنيۆەرسيتەتىنىڭ اعا عىلىمي قىزمەتكەرى ورازباي زاريپباي.
كىتاپتا XV جانە XVI عاسىرلاردا پارسى تىلىندە جازىلعان شاراف اد- دين الي ءيازديدىڭ «زافار ناما» جانە مۇحاممەد حايدار ءدۋلاتيدىڭ «تاريح- ي راشيدي» شىعارمالارىنان تۇركى تايپالارىنىڭ پايدا بولۋ ۋاقىتى تۋرالى جاڭا مالىمەتتەر كەلتىرىلگەن.
«بارشاڭىزدى شىڭعىس حان تۋرالى كىتاپتىڭ بۇگىنگى تۇساۋكەسەرىمەن قۇتتىقتايمىن! كىتاپتا ۇلى حاننىڭ شەجىرەسى، تۋعان جەرى تۋرالى زەرتتەۋلەر، عالىمداردىڭ توپوگرافيالىق جازبالارى جانە شىڭعىس حان مەن ونىڭ جاقىندارىنىڭ جەرلەنگەن ورنى سەكىلدى وزگە دە مالىمەتتەر كورسەتىلگەن. ايتا كەتۋ كەرەك، زەرتتەۋ بارىسىندا بۇگىنگە دەيىن قازاق تىلىندە جاريالانباعان «جاميعات- ات تاۋاريح» ەڭبەگى اۋدارىلدى» ، — دەدى كىتاپتىڭ اۆتورى ورازباي زاريپباي.
ءىس- شاراعا مەملەكەت قايراتكەرى، عالىم، فيلولوگيا عىلىمدارىنىڭ دوكتورى، پروفەسسور مىرزاتاي جولداسبەكوۆ، قالالىق ىشكى ساياسات باسقارماسىنىڭ باسشىسى داۋرەن بابامۇراتوۆ جانە وزگە دە زيالى قاۋىم وكىلدەرى قاتىستى.
تۇساۋكەسەردى «رۋحاني جاڭعىرۋ» جوبالىق كەڭسەسى ەلباسىنىڭ «رۋحاني جاڭعىرۋ» باعدارلاماسىنىڭ «تۇركى الەمىنىڭ گەنەزيسى» جانە «ارحيۆ-2025» ارنايى جوبالارى اياسىندا ۇيىمداستىردى.
