توكيو وليمپياداسىنداعى تۇعىرلار قايتا وڭدەلگەن پلاستيكتەن جاسالدى

توكيو. Kyodo-قازاقپارات - توكيودا وتەتىن وليمپيادا جانە پاراليمپيادا ۇيىمداستىرۋشىلارى جۋرناليستەرگە ماراپاتتاۋ راسىمىندە پايدالانىلاتىن قايتا وڭدەلگەن پلاستيكتەن جاسالعان تۇعىرلاردى كورسەتتى.

بۇل تۋرالى قازاقپارات Kyodo اگەنتتىگىنە سىلتەمە جاساپ حابارلايدى.

بۇل تۇعىرلار قايتا وڭدەلگەن بوتەلكەلەردەن، سونىمەن قاتار تەڭىزدەن شىعارىلعان پلاستيك قوقىستاردان ازىرلەندى. بۇدان بولەك، وليمپيادا جانە پاراليمپيادا ويىندارىنداعى تۇعىرلارعا ورناتىلعان ەمبلەمالاردى جاساۋدا 2011-جىلى بولعان جەر سىلكىنىسى كەزىندە قۇلاعان تۇرعىن ۇيلەردەن قالعان اليۋميني پايدالانىلعان. وسى ماتەريالداردىڭ ارقاسىندا ۇيىمداستىرۋشىلار «تۇراقتى ءومىر ءسۇرۋ» قاعيداسىن جۇزەگە اسىردى.

بۇل، سونىمەن قاتار، توكيودا وتەتىن ويىنداردىڭ تۇجىرىمدامالارىنىڭ ءبىرى، دەپ اتاپ وتەدى كيودو.

ايتا كەتسەك، وليمپيادالىق ويىندار 2021-جىلدىڭ 23- شىلدەسى مەن 8- تامىزى ارالىعىندا وتەدى، ال پاراليمپيادالىق ويىندار - 24- تامىز بەن 5- قىركۇيەك ارالىعىندا.