كوزى ناشار كورەتىن قاراعاندىلىق دومبىراشى بالا حالىقارالىق فەستيۆالدە باس جۇلدە الدى
جاس تالانتتار ءتورت نوميناتسيا بويىنشا جارىستى: ۆوكال، حورەوگرافيا، اسپاپتاردا ويناۋ، قيمىلمەن ءان سالۋ، دەپ حابارلايدى قازاقپارات ءتىلشىسى.
بايقاۋعا قازاقستان، رەسەي، گرۋزيا جانە وزبەكستاننان كەلگەن 10 جاستان 18 جاسقا دەيىنگى 3 مىڭعا جۋىق بالا قاتىستى. فينالعا 379 بالا شىقتى. 14 جاسار قاراعاندىلىق نۇرداۋلەت ساعاتبەك فەستيۆالدىڭ جالعىز گران-پري يەگەرى اتاندى.
مۋزىكانت دينا نۇرپەيىسوۆانىڭ «بۇلبۇل» كۇيىن ورىندادى. ول قاراعاندى وبلىسىنىڭ ءبىلىم باسقارماسىنىڭ كورۋ قابىلەتى بۇزىلعان بالالارعا ارنالعان 1№ ارنايى مەكتەپ-ينتەرناتىندا وقيدى. جەتەكشىسى - نۇرداۋلەت ىدىرىسوۆ.
«بالا كەزىمنەن مۋزىكامەن اۋەستەنەمىن. ءبىراق دومبىراعا 11 جاسىمدا جازىلدىم. ءۇش جىل ىشىندە 13 كۇي جانە ءبىر ءان جازدىم، ونى اتا-اناما ارنادىم. ءاننىڭ ءسوزىن وركەن مۇڭايتپاس جازعان.
فەستيۆال كەزىندە قاتتى ۋايىمدامادىم، ويتكەنى وزىمە سەنىمدى بولدىم جانە جەڭىسكە جەتەتىنىمدى سەزدىم. بولاشاقتا كومپوزيتور، كۇيشى بولعىم كەلەدى، مۋزىكا جازعىم كەلەدى. دومبىرادان باسقا، ۆوكالمەن دە اينالىسامىن جانە فورتەپيانودا وينايمىن»، - دەيدى نۇرداۋلەت.
بۇل - جاس مۋزىكانتتىڭ قورجىنىنداعى جالعىز جەڭىس ەمەس. ول رەسپۋبليكالىق جانە وبلىستىق بايقاۋلاردا بىرنەشە رەت بيىكتەن كورىنگەن. نۇرداۋلەتتەن باسقا فەستيۆالگە قاراعاندىنىڭ باسقا دا جاس تالانتتارى قاتىستى. ولار دا جاقسى ناتيجە كورسەتتى: - «قيمىلمەن ءان سالۋدا» جوعارى توپتار اراسىندا «3№ ارنايى مەكتەپ-ينتەرناتى» ك م م وقۋشىلارى الينا باكينا مەن يليا چيچۋليننىڭ دۋەتى 2-ورىندى يەلەندى. جەتەكشىسى - ەلەنا ليتۆيشكوۆا - «اسپاپتىق ورىنداۋدا» جوعارى توپتار اراسىندا «كورۋ قابىلەتى بۇزىلعان بالالارعا ارنالعان №1 ارنايى مەكتەپ-ينتەرناتى» ك م م تاربيەلەنۋشىسى نۇرشات باەتوۆا «قارلىعاش» حالىق ءانىن ورىنداپ، 2-ورىن الدى. جەتەكشىسى - نۇرداۋلەت ىدىرىسوۆ - «حورەوگرافيادا» جوعارى توپتار اراسىندا «9№ ارنايى مەكتەپ-ينتەرناتى» ك م م وقۋشىسى گۇلنار نۇرماعانبەتوۆا ءۇندى ءبيىن ورىنداپ، 3-ورىندى يەلەندى. جەتەكشىسى - اسەل جاعىپاروۆا.
