قازاق ادەبيەتىن دامىتۋ تۇجىرىمداماسىن جاساۋ كەرەك - ۇلىقبەك ەسداۋلەت
بۇل ۇسىنىس ماجىلىستە الەۋمەتتىك- مادەني دامۋ كوميتەتىنىڭ «جاڭا ۇلتتىق بىرەگەيلىكتى قالىپتاستىرۋداعى شىعارماشىلىق وداقتار مەن قوعامدىق ۇيىمداردىڭ ءرولى» تاقىرىبىنداعى دوڭگەلەك ۇستەل وتىرىسىندا ايتىلدى.
«تاۋەلسىزدىك العانىمىزعا 30 جىل تولدى. بۇل ارالىقتا جاڭا ۇرپاققا جاڭا ەرەجەلەر قاجەت ەكەنىن ءتۇسىندىم. بىزدە قازىرگى زاماناۋي فيلوسوفتار جوق. ءبىز يندۋستريالاندىرۋدىڭ ءتورتىنشى باعدارلاماسىن جۇزەگە اسىراتىن ۋاقىتتا ءومىر سۇرۋدەمىز جانە وكىنىشكە قاراي، رۋحاني سالادا ۇتىلىپ كەلەمىز. ەلىمىز ەكونوميكالىق رەفورماعا كوشىپ جاتىر، ءبىراق مادەنيەتكە، رۋحاني سالاعا قولداۋ از، سول سەبەپتى قوعامىمىزدا رۋحاني داعدارىس بولدى. سىبايلاس جەمقورلىق جانە باسقا دا قوعامداعى كەلەڭسىز قۇبىلىستار ءبىزدىڭ رۋحاني دامۋىمىزعا ىقپال ەتتى، سوندىقتان جاس ۇرپاقتىڭ مادەني دامۋى ارتتا قالىپ كەلەدى. وكىنىشتىسى، ءبىز كەيبىر قۇندىلىقتاردى جوعالتىپ الدىق. ەلىمىزدە قازاق ادەبيەتىنىڭ جاعدايى ءماز ەمەس، سەبەبى قولداۋ جوق. ارينە، سوڭعى ۋاقىتتا كىتاپحانا قورلارى تولىقتى، ءبىراق اۋداندىق نەمەسە اۋىلدىق ەلدىمەكەندەرگە جاڭا كىتاپتار جەتپەيدى»، - دەدى ۇ. ەسداۋلەت.
ونىڭ ايتۋىنشا، رۋحاني دامۋدى قالىپتاستىرۋ - باستى مىندەت بولۋى كەرەك جانە ۇلتتىق بىرەگەيلىك ءۇشىن ەڭ الدىمەن، مادەنيەتتى دامىتۋ قاجەت.
«بۇل - قىسقا مەرزىمدە وزگەرتۋگە بولاتىن قۇبىلىس ەمەس، وعان ۋاقىت كەرەك. جاستارعا ەڭبەكسۇيگىشتىكتىڭ جاڭا قاسيەتتەرىن ۇيرەتۋىمىز كەرەك. ادەبيەتتەگى باستى قارۋ - ءتىل. دەمەك، جاستار انا تىلىندە سويلەۋى قاجەت. ولار بىرنەشە ءتىلدى ءبىلۋى مۇمكىن، ءبىراق ەڭ الدىمەن انا تىلىندە سويلەپ ۇيرەنۋى ءتيىس. سوندىقتان قازاق تىلىندەگى مۋلتفيلمدەر ارناسىن اشىپ، الەمدىك مۋلتفيلمدەردى قازاق تىلىنە اۋدارۋ كەرەك. ارينە، ءبىز جاھاندانۋدان قورقاتىنبىز، ءبىراق جاھاندانۋ بىزگە باياعىدا كەلدى. قازىر كىشكەنتاي بالالار قازاقشا ەمەس، شەتەلدىك ونىمدەردى كوپ كورەدى، بۇل ءبىزدىڭ يدەولوگيامىزعا وتە زيان. ءبىز ءۇشىن ەڭ باستىسى - وسكەلەڭ ۇرپاقتىڭ انا تىلىندە ءبىلىم الۋى، ودان ءارى باسقا تىلدەردى وقىپ، باسەكەگە قابىلەتتى بولۋى. مۇنىڭ ءبارى وقۋلىقتارعا، مادەنيەتكە، ونەرگە جانە ەڭ الدىمەن تىلگە بايلانىستى. «باسپا ءسوز تۋرالى» زاڭ قابىلداپ، قازاق ادەبيەتىن دامىتۋ تۇجىرىمداماسىن جاساۋ قاجەت. مۇنداي تۇجىرىمدامالار ءبىزدىڭ كورشىلەرىمىزدە دە بار. سوسىن ۇلتتىق بىرەگەيلىكتى دامىتۋ تۋرالى تۇجىرىمداما قابىلداۋدى ۇسىنامىن»، - دەيدى ۇ. ەسداۋدەت.
اۆتور: ايجان سەرىكجان قىزى
