اسقار مامين وزبەكستاندىق ارىپتەسىمەن كەزدەستى

نۇر-سۇلتان. قازاقپارات - ق ر پرەمەر-ءمينيسترى اسقار مامين قازاقستانعا جۇمىس ساپارىمەن كەلگەن وزبەكستان رەسپۋبليكاسىنىڭ پرەمەر-ءمينيسترى ابدۋللا اريپوۆپەن كەلىسسوز جۇرگىزدى، دەپ حابارلايدى قازاقپارات.

ۇكىمەت باسشىلارى ساۋدا-ەكونوميكالىق، ينۆەستيتسيالىق، اۋىل شارۋاشىلىعى، ەنەرگەتيكالىق، كولىك-لوگيستيكالىق ىنتىماقتاستىقتىڭ، ونەركاسىپتىك كووپەراتسيانىڭ، سونداي-اق ايماقارالىق جانە شەكارا ماڭىنداعى ءوزارا ءىس-قيمىلدىڭ وزەكتى ماسەلەلەرىن تالقىلادى.

قازاقستان-وزبەكستان شەكاراسىنداعى «ورتالىق ازيا» حالىقارالىق ساۋدا- ەكونوميكالىق ىنتىماقتاستىق ورتالىعىنىڭ (ح س ە ى و) قىزمەتىن ۇيىمداستىرۋ جونىندەگى ءىس-شارالار جوسپارىن جۇزەگە اسىرۋدى جەدەلدەتۋگە ەرەكشە نازار اۋدارىلدى.

ترانسشەكارالىق سۋ رەسۋرستارىن ۇتىمدى پايدالانۋ جانە قورعاۋ سالاسىنداعى ءوزارا ءىس-قيمىلدى، ونىڭ ىشىندە قىرعىزستان مەن تاجىكستان جىبەرەتىن سۋدى وزبەكستان اۋماعى ارقىلى تۇركىستان جانە قىزىلوردا وبلىستارىنىڭ مۇقتاجدىقتارى ءۇشىن كەدەرگىسىز ترانزيتتەۋدى دامىتۋ ماسەلەلەرى قارالدى. قازاقستان مەن وزبەكستان اراسىنداعى تابىستى ونەركاسىپتىك كووپەراتسيانىڭ ءبىر مىسالى بىرلەسكەن جوبالار - قوستاناي قالاسىنداعى «Chevrolet» ماركالى اۆتوموبيلدەر ءوندىرىسى، تۇركىستان قالاسىنداعى تىگىن فابريكاسى، شىمكەنت قالاسىنداعى توقىما فابريكاسى جانە ت. ب. بولىپ تابىلادى.

قازىرگى ۋاقىتتا مەديتسينالىق بۇيىمدار (شىمكەنت ق.)، اۆتوكلاۆتى گازوبەتون (تاشكەنت وبلىسى)، «SAZ» ماركالى اۆتوبۋستار (قوستاناي ق.)، «HOWO» جۇك اۆتوموبيلدەرى (ساران ق.)، «Hyunday « ماركالى اۆتوموبيلدەردى قۇراستىرۋ (ۇرگەنىش ق.)، اس ءۇي پليتالارى مەن سۋ جىلىتقىشتار (تۇركىستان ق.) ءوندىرىسى سياقتى بىرلەسكەن جوبالار ىسكە اسىرىلۋدا.

ەكى ەل اراسىنداعى اۋە قاتىناسىن كەڭەيتۋ اياسىندا ا. ج. 8 - ماۋسىمنان باستاپ «وزبەك اۋە جەلىسى» الماتى مەن سامارقاند قالالارى اراسىندا جولاۋشىلار اۋە تاسىمالىن باستايدى، ال بيىلعى 21 - ماۋسىمدا «Fly Arystan» قازاقستاندىق كومپانياسى «تۇركىستان - تاشكەنت» باعىتى بويىنشا تۇراقتى رەيستەر اشادى.

وزبەكستان — قازاقستاننىڭ ورتالىق ازيا وڭىرىندەگى نەگىزگى ساۋدا سەرىكتەسى — ءو ر ۇلەسى ق ر- نىڭ ورتالىق ازيا ەلدەرىمەن سىرتقى ساۋداسىنىڭ %65- عا جۋىعىن قۇرايدى. 2021-جىلعى قاڭتار-ساۋىردە ەكىجاقتى تاۋار اينالىمى $1,2 ميلليارد قۇرادى، بۇل وتكەن جىلدىڭ سايكەس كەزەڭىندەگى كورسەتكىشتەن %41,3 عا جانە 2019-جىلدىڭ العاشقى ءتورت ايىنىڭ كورسەتكىشىنەن %33,3 عا جوعارى.

2020 -جىلى وزبەكستاندا قازاقستاندىق كاپيتالدىڭ قاتىسۋىمەن كاسىپورىندار سانى 809 دان 919 كومپانياعا دەيىن ءوستى. قازاقستاندا وزبەك كاپيتالىنىڭ قاتىسۋىمەن كاسىپورىندار سانى 1231 گە جەتتى.

كەلىسسوز قورىتىندىسى بويىنشا ا. مامين مەن ا. اريپوۆ ساۋدا-ەكونوميكالىق قاتىناستاردى دامىتۋ، تاجىريبە الماسۋ جانە بىرلەسكەن تاۋار وتكىزۋ جۇيەسىن قالىپتاستىرۋداعى ىنتىماقتاستىق تۋرالى ۆەدومستۆوارالىق كەلىسىمدەرگە قول قويدى.