جانىبەك ءالىمحان ۇلى گولوۆكيننىڭ كەلەسى قارسىلاسىن الىپ قويماق

نۇر-سۇلتان. قازاقپارات - قازاقستاندىق بوكسشى جانىبەك ءالىمحان ۇلى (9-0، 5 ك و) ورتا سالماقتا WBA چەمپيونى ريوتا مۋراتامەن (16-2، 13 ك و) جەكپە-جەككە شىقپاق، دەپ حابارلايدى Vesti.kz.

ال جاپونيالىقپەن وزگە قازاقستاندىق گەننادي گولوۆكين (41-1-1، 36 ك و) جەلتوقساندا ايقاساتىن بولىپ جوسپارلاعان ەدى. جانىبەك وسى ماسەلە بويىنشا پروموۋتەرىنە ۇسىنىس ايتتى.

«بوب ارۋم، Top Rank، مۋراتامەن قىركۇيەكتە جەكپە-جەك ۇيىمداستىرىپ بەرىڭدەر. مەن ونى ۆەگاستا سابايمىن. ال جەلتوقساندا جاپونيادا قارىمتا وتكىزەمىز. وسىدان كەيىن بارلىق بەلبەۋدى يەمدەنەمىز! 26- ماۋسىم؟ جەڭىل ايقاس!» - دەپ جازىپتى جانىبەك Twitter جەلىسىندە.