كوپبالالى انالاردىڭ باسپانا جالداۋ اقىسىن سۋبسيديالاۋ مولشەرى جاريالاندى
ق ر يندۋستريا جانە ينفراقۇرىلىمدىق دامۋ مينيسترلىگىنىڭ Telegram كانالىندا جاريالانعان اقپاراتقا سايكەس، بۇگىندە ەلىمىزدە 562 مىڭ ازامات ءۇي الۋ كەزەگىندە تۇر. ونىڭ ىشىندە 185 مىڭ ادام - وتباسىنىڭ ءاربىر مۇشەسىنە شاققاندا تابىسى ەڭ تومەنگى كۇنكورىس دەڭگەيىنەن تومەن ساناتقا جاتادى.
ولار نەگىزىنەن - كوپبالالى وتباسىلار، جەتىم بالالار، مۇگەدەك بالالارى بار وتباسىلار جانە حالىقتىڭ باسقا دا الەۋمەتتىك از قورعالعان توپتارى. ولارعا ارناپ جالعا بەرىلەتىن باسپانا قۇرىلىسىنا جەكە ينۆەستيتسيالاردى تارتا وتىرىپ، جەكە تۇرعىن ءۇي قورىنان جالداۋ اقىسىن سۋبسيديالاۋ تەتىگى ەنگىزىلىپ جاتىر.
«جالداۋ اقىسى نۇر-سۇلتان جانە الماتى قالالارى ءۇشىن - 31 ايلىق ەسەپتىك كورسەتكىش (90427 تەڭگە)، وزگە وڭىرلەر ءۇشىن - 21 ايلىق ەسەپتىك كورسەتكىش (61257 تەڭگە) جانە اۋىلدىق جەرلەر ءۇشىن - 15 ايلىق ەسەپتىك كورسەتكىش (43755 تەڭگە) مولشەرىندە مەملەكەتتىك قاراجات ەسەبىنەن سۋبسيديالانادى»، - دەپ اتاپ وتەدى مينيسترلىكتەن.
تاراتىلعان اقپاراتقا قاراعاندا، كەزەكتە تۇرعان قالعان 377 مىڭ ادام - وتباسىنىڭ ءاربىر مۇشەسىنە شاققاندا 1 ەڭ تومەنگى كۇنكورىس دەڭگەيىنەن جوعارى تابىس تابادى. ولارعا مەملەكەتتىك قىزمەتكەرلەر، بيۋجەتتىك مەكەمە قىزمەتكەرلەرى، تولىق ەمەس وتباسىلار جاتادى (جىل سايىن 32 مىڭ ادامعا ارتىپ كەلەدى).
«وتباسى بانك» ارقىلى ول ازاماتتارعا كرەديتتىك تۇرعىن ءۇي جانە جەڭىلدەتىلگەن نەسيە بەرىلەدى. وسى ماقساتپەن «وتباسى بانكى» بازاسىندا «العاشقى تۇرعىن ۇيمەن قامتاماسىز ەتۋ ورتالىعى» قۇرىلدى. ورتالىق كەزەكتە تۇرعان ازاماتتارمەن جۇمىس جۇرگىزەدى.
