بەيبىت اتامقۇلوۆ قۇرىلىس ارماتۋراسىنىڭ نەگە قىمباتتاعانىن ءتۇسىندىردى

نۇر- سۇلتان. قازاقپارات - ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ قۇرىلىس ارماتۋراسىنىڭ قىمباتتاۋ سەبەبىن ءتۇسىندىردى، دەپ حابارلايدى قازاقپارات ءتىلشىسى.

«بيىل بۇل الەمدىك ءۇردىس بولىپ تۇر. بىزدە دە، كورشىلەرىمىزدە دە، جالپى الەمدە قۇرىلىس ماتەريالدارىنا، قۇرىلىس ارماتۋراسىنا باعا كۇرت ءوسىپ كەتتى. بۇل كوپتەگەن ەلدىڭ پاندەميادان كەيىن ەكونوميكالىق داعدارىستان شىعىپ، قارقىندى قۇرىلىس جۇرگىزىپ جاتقانىمەن بايلانىستى»، - دەدى مينيستر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا كەلىپ تۇسكەن سۇراققا وراي.

ونىڭ اتاپ وتۋىنشە، شيكىزات، مەتالل سىنىقتارىنىڭ باعاسى دا كۇرت قىمباتتادى. مۇنداي جايت الەمنىڭ بارلىق ەلىندە بايقالادى.

«نارىق جىلدام ءوسىپ بارادى. ونىڭ باعاسى 320-330 مىڭ تەڭگەدەن 400 مىڭ تەڭگەگە جەتىپ قالدى. دەگەنمەن، كورشى رەسەيمەن سالىستىرعاندا باعا ايىرماشىلىعى شامامەن 5 پايىزدى قۇرايدى. ارماتۋرانىڭ ۇلكەن كولەمىن رەسەيدەن ساتىپ الىپ وتىرمىز. ءوزىمىزدىڭ ءوندىرىس كولەمىمىز بار. ءبىراق، ول جەتكىلىكسىز. قۇرىلىس قارقىندى ءجۇرىپ جاتىر. وسى جىلى 17 ميلليون شارشى مەتر تۇرعىن ءۇي سالۋىمىز قاجەت. مۇنىڭ بارلىعى باعا پارامەترلەرىنە اسەرىن تيگىزەدى»، - دەدى بەيبىت اتامقۇلوۆ.

ال سەمەنت باعاسى تۇسپەسە، يمپورتقا رۇقسات بەرىلۋى مۇمكىن.

«ەلىمىزدە 12 سەمەنت ءوندىرۋشى بار. جىل سايىن 15 ميلليون توننا سەمەنت وندىرەدى. ال تۇتىنۋ كولەمى - 9,5 ميلليون توننانىڭ ماڭايىندا.

ءوندىرۋشى باعانى ارى كەتسە 5 پايىز عانا كوتەرگەن. قالعان ءوسىمنىڭ ءبارى الىپ ساتقىشتار مەن ساۋدا كومپانيالارىنىڭ تاراپىنان بولعانىن كورىپ وتىرمىز. ءبىز ءوز كەزەگىمىزدە باسكەلەستىكتى قورعاۋ جانە دامىتۋ اگەنتتىگىنە جۇگىندىك. ولار نارىقتاعى باعانى تەكسەرەدى. قازىر سولارمەن بىرگە تالداۋ جاساپ جاتىرمىز. سونىڭ قورىتىندىسى بويىنشا اكىمشىلىك شارالار قابىلدانادى»، - دەدى بەيبىت اتامقۇلوۆ.

مينيستر باعانى ىرىققا كوندىرۋ ءۇشىن رەتتەۋ تەتىكتەرى ىسكە قوسىلاتىنىن ەسكەرتتى.

«ەگەر اگەنتتىكتىڭ تەكسەرۋى كەزىندە باعانى قولدان ءوسىرۋ انىقتالسا، مينيسترلىك سەمەنت يمپورتىنا رۇقسات ەنگىزەدى. وسىلايشا ىشكى نارىقتا سەمەنتتىڭ ۇسىنىسى كوبەيەدى. بۇل اۆتوماتتى تۇردە بەتوننىڭ قۇنىنا، قۇرعاق قوسپالاردىڭ قۇنىنا اسەر ەتەدى. وسىلايشا يمپورتتىق ينتەرۆەنتسيا ەسەبىنەن باعانى تۇسىرە الامىز. ءبىز قابىلداي الاتىن اقتىق شارا وسى بولادى. ال الدىن الا كەلىسىپ الۋ، سىبايلاستىق تۋرالى ايتساق، باسەكەلەستىكتى قورعاۋ جانە دامىتۋ اگەنتتىگىنىڭ تەكسەرۋى ءبارىن انىقتايدى. ول تۋرالى قوسىمشا حابارلايمىز»، - دەدى ۆەدومستۆو باسشىسى.

اۆتور: مارلان جيەمباي