ەرتىس وزەنىنىڭ قازاقستاندىق بولىگىندە كەمەلەر تولاسسىز جۇرەتىن بولادى
بۇل تۋرالى حالىققا ەسەپ بەرۋ كەزدەسۋىندە ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ايتتى، دەپ حابارلايدى قازاقپارات ءتىلشىسى.
«وزەن كولىگى سالاسىندا قازىرگى ۋاقىتتا رەسەيمەن ەكىجاقتى تاسىمالداردى كەڭەيتۋ ءىس- شارالارى قابىلدانىپ جاتىر. 2021 -جىلدىڭ وزىندە وزەن كولىگىمەن 350 مىڭ توننا قيىرشىق تاس، قۇرىلىس ماتەريالدارىن تاسىمالداۋ جوسپارلانعان. قىتايمەن مۋلتيمودالدىق قاتىناستى ۇيىمداستىرىلادى. بۇل رەتتە ەرتىس وزەنىنىڭ قازاقستاندىق بولىگى بويىنشا تولاسسىز كەمە قاتىناسىن قامتاماسىز ەتۋ ءۇشىن كەمە قاتىناسى شليۋزدەرىن كۇردەلى جوندەۋ بويىنشا جۇمىستار جۇرگىزىلۋدە»، - دەدى مينيستر.
ونىڭ اتاپ وتۋىنشە، رەسەيمەن سۋ كولىگى قاتىناسىن دامىتۋعا وتكەن جىلى ەۋرازيالىق وداق اياسىندا قابىلدانعان كەمە قاتىناسى تۋرالى كەلىسىمنىڭ راتيفيكاتسيالانۋى ىقپال ەتەدى.
«تۇتاستاي العاندا، ىشكى سۋ جولدارىندا قابىلدانىپ جاتقان شارالار 2025 -جىلعا قاراي وزەن تاسىمالدارىنىڭ كولەمىن 3,8 ميلليون تونناعا دەيىن جەتكىزۋگە مۇمكىندىك بەرەدى»، - دەدى بەيبىت اتامقۇلوۆ.
اۆتور: مارلان جيەمباي
