حالىق ساناعى: ءداستۇرلى جانە ونلاين ساۋالناماعا قالاي قاتىسۋ كەرەك
ونىڭ ايتۋىنشا، ساناق ەكى كەزەڭگە بولىنەدى. ءبىرىنشى دايىندىق كەزەڭى 1-30 -ماۋسىم ارالىعىندا وتەدى. ونىڭ نەگىزگى ماقساتى - ادامداردىڭ كورسەتىلگەن مەكەنجايدا تۇرۋىن ناقتىلاۋ. ول حالىقتان اۋىزشا ساۋالناما سۇراۋ ارقىلى وتەدى. ەكىنشى كەزەڭدە - جينالعان مالىمەت ساناق پەرسونالىنا بولىنەدى.
«2021 -جىلعى ۇلتتىق ساناقتىڭ باستى جاڭاشىلىقتارىنىڭ ءبىرى – 1 - قىركۇيەك پەن 15- قازان ارالىعىندا ونلاين رەجيمدە وزدىگىنەن ساۋالناما پاراقتارىن تولتىرۋ مۇمكىندىگى بولادى. جۇيە تاۋلىگىنە 24 ساعات قولجەتىمدى بولادى، رەسپوندەنتتەر ساناققا قاتىسۋ ءۇشىن وزىنە ىڭعايلى ۋاقىتتى تاڭداي الادى، سايتتا بلانك تولتىرۋدى توقتاتىپ، كەيىننەن جالعاستىرا الادى. ودان باسقا، Egov پلاتفورماسىندا ەلەكتروندىق سيفرلىق قولتاڭبا ارقىلى جانە Aitu موبيلدى قوسىمشاسى ارقىلى ساناقتان وتۋگە بولادى»، - دەدى ج. داۋرەنوۆ ەلوردا اكىمدىگىندە وتكەن باسپا ءسوز ءماسليحاتىندا.
ءداستۇرلى ۇلتتىق ساناق ونلاين رەجيمدە ساناقتان وتپەگەن تۇرعىندار ءۇشىن 1-30 -قازان ارالىعىندا وتەدى. ءداستۇرلى ساناقتىڭ جاڭاشىلىقتارى - ينتەرۆيۋەردىڭ ەلەكتروندى پلانشەتتەردى پايدالانۋى، زاماناۋي سيفرلىق تەحنولوگيانىڭ ەنۋى مەن ۇردىستەردىڭ اۆتوماتتانۋى بولماق. بۇل دەرەكتەر ساپاسىنا ادام فاكتورىنىڭ ىقپالىن ازايتادى جانە دەرەكتەردىڭ بازاعا تولىق ەنۋىنە مۇمكىندىك بەرەدى.
«بىزدەگى حالىق اراسىنداعى ساۋالناما جۇرگىزەتىن ينتەرۆيۋەرلەر ءۇشىن مىندەتتى تالاپ - جەكە باسىن كۋالاندىراتىن قۇجات پەن بەيدجدىڭ بولۋى، سۋرەتى، اتى- ءجونى، بەرىلگەن كۇنى، قولدانۋ مەرزىمى اۋماقتىق ستاتيستيكا ورگانىنىڭ قولىمەن جانە مورىمەن راستالعان بولۋى ءتيىس. حالىق ساناعى بەلگىسى بار كوك ءتۇستى شارف پەن پورتفەل بولۋى كەرەك. نۇر- سۇلتان قالاسىندا 4 اۋدان بار، جالپى قالا تۇرعىندارىنىڭ سانى 1 -مامىردا 1 ميلليون 199083 ادامدى قۇراعان. وسى نەگىزگى مالىمەتتى ساناق بارىسىندا راستاۋىمىز قاجەت»، - دەپ ءتۇسىندىردى دەپارتامەنت وكىلى.
ساناق بارىسىندا رەسپۋبليكا تۇرعىندارى ءۇشىن 1446 ءبىرىڭعاي كولل- ورتالىعى جۇمىس ىستەيدى. وعان ستاتسيونارلىق جانە ۇيالى تەلەفوننان قوڭىراۋ شالۋ تەگىن.
اۆتور: ايجان سەرىكجان قىزى
