قىتايدا ءۇشىنشى بالانى جوسپارلاعاندارعا قولايلى جاعداي جاسالماق
حالىق قارتايا باستاعاندىقتان، بيلىك ءۇش بالا تۋۋعا رۇقسات بەردى. ەندى وتباسىلارعا ايىپپۇل سالىنبايدى. كەرىسىنشە ولارعا قولايلى جاعداي جاسالادى. بالالاردى قورعاۋ كۇنىنە وراي بۇكىل ەل اۋماعىندا مەرەكەلىك شارالار ۇيىمداستىرىلدى. كەيبىر مەكتەپتەر دەمالىس جاريالادى. ال تاياۋدا بيلىك وتباسىلارعا ءۇشىنشى بالا تۋۋعا رۇقسات بەردى.
10 جىل بۇرىن ەكىنشى بالا تاپقان اتا- انالارعا ايىپپۇل سالىناتىن. بۇل ءۇشىن مەملەكەتتىك قىزمەتكەرلەردى جۇمىستان دا شىعاراتىن. 2016 -جىلى قىتاي ۇكىمەتى ەكىنشى بالاعا رۇقسات بەردى. بەس جىل وتىسىمەن جاڭا جەڭىلدىك جاسالدى.
ليۋ چيجيا، بەيجىڭ قالاسىنىڭ تۇرعىنى:
- ەڭ الدىمەن ۇكىمەت ايەلدەردى جۇمىسپەن قامتۋ ماسەلەسىن شەشۋ كەرەك. كومپانيالاردىڭ كوبى ايەلدىڭ ءۇش رەت بالا تۋۋ دەمالىسىنا شىعۋىنا قارسى بولادى. ەگەر ۇكىمەت بۇل ماسەلەنى شەشسە، جۇرت ءۇشىنشى بالا تابۋعا كەلىسەر.
جەرگىلىكتى تۇرعىنداردى ساپالى ءبىلىم ماسەلەسى دە الاڭداتىپ وتىر. ماسەلەن، مۋزىكا نەمەسە وقۋ ءپانى بويىنشا جەكە ساباقتىڭ ءبىر ساعاتى 100 دوللارعا دەيىن جەتەدى. جاقسى مەكتەپكە بالانى ورنالاستىرۋ ءۇشىن ونىڭ قاسىندا تۇرۋ كەرەك. سوندىقتان ءبىلىم وردالارىنا جاقىن ۇيلەردە پاتەر باعاسى بىرنەشە ەسە قىمبات. ۇكىمەت وسى ماسەلەلەردى شەشۋگە نيەتتى.
چان جيان، نانكاي ۋنيۆەرسيتەتى ادام قۇقىقتارى ورتالىعىنىڭ جەتەكشىسى:
- ورتا جانە كىشى سىنىپتاردا ادام قۇقىقتارى جونىندە ءبىلىم بەرۋ ماسەلەسىن زەرتتەپ جاتىرمىز. ادام قۇقىقتارى جونىندە، اتاپ ايتقاندا كامەلەتكە جەتپەگەندەردىڭ قۇقىقتارىن قورعاۋ زاڭى بويىنشا پاندەر ەنگىزۋ قاراستىرىلىپ وتىر. قازىردىڭ وزىندە بالالارعا جانە ۇستازدارعا ارنالعان ءتيىستى وقۋلىقتارىمىز بار.
2016 -جىلدان بەرى ەلدە بالا سانى كوبەيگەن جوق. كەرىسىنشە سوڭعى جىلدارى بالا تۋۋ ازايىپ كەتتى. وتاۋ قۇرعىسى كەلەتىن جاستار سانى دا قىسقارىپ كەلەدى. ۇكىمەت وسى جاعدايدى وزگەرتۋگە تىرىسىپ جاتىر.
