قازاقستاندىقتار وتباسى مەن بالالار تۋرالى نە ويلايدى - ساۋالناما

نۇر-سۇلتان. قازاقپارات - ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى قازاقستاندىقتار اراسىندا وتباسى جانە بالالار تۋرالى جۇرگىزىلگەن ساۋالناما قورىتىندىسىن جاريالادى، دەپ حابارلايدى قازاقپارات.

18 جانە ودان جوعارى جاستاعى قازاقستاندىقتاردىڭ الەۋمەتتانۋشىلىق ساۋالناماسىنىڭ ناتيجەلەرىنە سايكەس رەسپوندەنتتەردىڭ %82,3 وتباسىلى ادام، ياعني ولار جۇبايىمەن بىرگە تۇرادى نەمەسە بۇرىن تۇرعان.

تيىسىنشە، ۇيلەنبەگەن جانە بويداق رەسپوندەنتتەردىڭ ۇلەسى %17,7 دى قۇرادى. ەلىمىزدە ساۋالناما الىنعانداردىڭ %76,6 اتا-انالار بولىپ تابىلادى، بۇل رەتتە %58,7 ىندا كامەلەتكە تولماعان بالالارى بار، ال رەسپوندەنتتەردىڭ %17,9 ىندا بالالارى كامەلەتكە تولعان.

كوبىنەسە وتباسىندا 2 كامەلەتكە تولماعان بالا بارلار باسىم (%36,9). شامامەن ءاربىر ءتورتىنشى وتباسىندا 16 جاسقا دەيىنگى ءبىر بالا نەمەسە وسىنداي ءۇش بالا بار.

رەسپوندەنتتەردىڭ %12,8 ىندا 4 جانە ودان دا كوپ بالاسى بار، ياعني كوپ بالالى وتباسىلار.

ساۋالناما بارىسىندا قازاقستاندىقتارعا: «ءسىز ومىردە باقىتتى وتباسىن قۇرىپ، جاقسى بالالاردى تاربيەلەي الدىڭىز با؟» دەگەن سۇراق قويىلدى.

رەسپوندەنتتەردىڭ باسىم كوپشىلىگى بۇل سۇراققا وڭ جاۋاپتار بەردى. قاتىسۋشىلاردىڭ %91,8 باقىتتى وتباسى تۋرالى وڭ كوزقاراس تانىتتى. سونىمەن قاتار، ولاردىڭ %67,7 باقىتتى وتباسىن قۇرىپ ۇلگەردى جانە رەسپوندەنتتەردىڭ %24,1 باقىتتى وتباسى قۇرا الاتىنىنا سەنىمدى.

ساۋالناماعا قاتىسقانداردىڭ %92,7 جاقسى بالالاردى تاربيەلەۋگە وڭ كوزقاراسپەن قارايدى.

رەسپوندەنتتەردىڭ %61,0 نىڭ پىكىرىنشە، ولار جاقسى بالالاردى تاربيەلەي الدى. تاعى %31,7 ءوز بالالارىن جاقسى تاربيەلەي الاتىنىنا سەنىمدى.