تۇركىستان وبلىسىندا «بالا شاقتان - بولاشاققا» اتتى بالالار ادەبيەتى فەستيۆالى ءوتتى
اتالعان شارادا بالالار «اجەنىڭ ەرتەگىسىن» تىڭداپ، تەاترلاندىرىلعان «التىن ايدارلى بالا» قويىلىمىن تاماشالادى، دەپ حابارلايدى قازاقپارات ءتىلشىسى.
فەستيۆالگە وبلىستىق ادامي الەۋەتتى دامىتۋ باسقارماسىنىڭ باسشىلىعى مەن ق. ا. ياساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ رەكتورى جانار امانگەلدى قىزى، وقۋشىلار سارايىنىڭ باسشىلىعى مەن بالالارعا ارنالعان كىتاپتاردىڭ اۆتورلارى، كىشكەنتاي بۇلدىرشىندەر قاتىستى. ⠀ شارادا سوڭعى كەزدە جارىق كورگەن تاربيەلىك، تانىمدىق جانە الەمدىك كلاسسيكالىق شىعارمالار تانىستىرىلدى. بالالار قىزىعۋشىلىعىن ارتتىرۋ، ولاردىڭ وي- ورەسىن جەتىلدىرۋ ءۇشىن «ويناي ءوس، ويلاي ءوس!» تانىمدىق ورىندارى ويناتىلىپ، جەڭىمپازدارعا سىيلىقتار بەرىلدى.
فەستيۆال بارىسىندا بالالار مەن جاستار «حارري پوتتەر مەن جاسىرىن بولمە» كىتابىنىڭ جاۋاپتى رەداكتورى نازگۇل قوجابەك، «وتباسى حرەستوماتياسى» جوباسىنىڭ اتقارۋشى ديرەكتورى باعدات قۇديار جانە بالالار جازۋشىسى، عالىم زيرا ناۋرىزبايەۆامەن كەزدەسىپ، وزدەرىنىڭ كوكەيدە جۇرگەن سۇراقتارىنا جاۋاپ الدى.
اۆتورلار ءوز جۇمىستارىن تانىستىرىپ، شىعارمالاردىڭ بالانىڭ دامۋىنا اسەرى جونىندە ايتتى اۋدارما مەن كىتاپ شىعارۋ كەزىندەگى قىزىقتارى مەن قيىندىقتارىن ءبولىستى.
«بالالار - ءبىزدىڭ بولاشاعىمىز! دەسە دە سوڭعى جىلدارى بالالار ادەبيەتىنە دەگەن تاپشىلىق بايقالادى. قازىر وسى ماقساتتا كوپ جۇمىستار اتقارىلىپ جاتىر. سونىڭ ءبىرى وسى - بۇگىنگى فەستيۆال. وسىنداي شارالار ارقىلى بالالار ادەبيەتىن دامىتۋعا، بالالاردىڭ وي- ءورىسىن وسىرۋگە ىقپال ەتەمىز دەگەن ويدامىز. بۇل ماقسات جولىندا ەڭبەك ەتىپ جۇرگەن بارشاڭىزعا العىس ايتىپ، جۇمىستارىڭىزعا ساتتىلىك تىلەيمىن!»، - دەدى وقۋشىلار سارايىنىڭ ديرەكتورى ينديرا سارقىت قىزى.
ايتا كەتەيىك، مۇنداي فەستيۆال وبلىستا العاش رەت ۇيىمداستىرىلىپ وتىر. ونىڭ نەگىزگى ماقساتى - بالالاردى كىتاپ وقۋعا باۋلۋ، بالالار جازۋشىلارىن دارىپتەۋ بولماق.
