الماتى اۋەجايىندا ەكى ۇشاق سوقتىعىستى

الماتى. قازاقپارات - الماتى اۋەجايىندا تىركەپ سۇيرەۋ كەزىندە A 320 ۇشاعى Boeing 767 ۇشاعىن جاناپ ءوتتى.

ەكى اۋە كەمەسى دە Air Astana اۋە كومپانياسىنا تيەسىلى، دەپ حابارلايدى قازاقپارات ءتىلشىسى.

اۋە كومپانيانىڭ باسپا ءسوز قىزمەتى حابارلاعانداي، اتالعان وقيعا الماتى اۋەجايىندا 29 - مامىر كۇنى بولعان.

«انگاردىڭ تەحنيكالىق تۇراعى ماڭىندا تەحنيكالىق جۇمىستاردىڭ جۇرگىزۋ ءۇشىن ۇشاقتى تىركەپ سۇيرەمەك بولعان كەزدە A 320 ۇشاعى شاركلەتىمەن Boeing 767 ۇشاعىنىڭ ستابيليزاتورىن جاناپ ءوتتى. ەكى بورت تا Air Astana اۋە كومپانياسىنا تيەسىلى. قازىر ەكى ۇشاقتا دا جوندەۋ جۇمىستارى جۇرگىزىلىپ جاتىر. سونداي-اق تەرگەۋ امالدارى دا باستالدى، - دەلىنگەن حابارلامادا.