پوليتسەي شارىن شاتقالىندا وقۋشىنى قۇتقارۋ وپەراتسياسى قالاي وتكەنىن باياندادى

تالدىقورعان. قازاقپارات - الماتى وبلىسىنىڭ شارىن شاتقالىندا سەلمەن اعىپ كەتكەن قىزدى ىزدەستىرۋ وپەراتسياسىنا قاتىسقان پوليتسەي وقيعانىڭ ءمان-جايىن بايانداپ بەردى.

قۇتقارۋ جۇمىستارىنا ۇيعىر اۋداندىق پوليتسيا ءبولىمىنىڭ 50 گە جۋىق قىزمەتكەرى قاتىسقان، دەپ حابارلايدى قازاقپارات ءتىلشىسى.

جاس ءوسپىرىمدى ىزدەستىرۋدىڭ ەكىنشى كۇنىندە ۇيعىر اۋداندىق پوليتسيا ءبولىمى، تابيعات قورعاۋ پوليتسيا توبىنىڭ ينسپەكتورى سايات داركەنبايەۆقا قورىقشى وزەن ماڭىندا قوزعالىستىڭ بايقالعانى تۋرالى بەلگى بەرگەن.

ءتارتىپ ساقشىسى كومەك شاقىرۋ ءۇشىن ءوز قىزمەتتىك كولىگىمەن بازاعا كوتەرىلگەن. ارتىنشا تىكۇشاقتاعى قۇتقارۋشىلارعا قىزدىڭ ورنالاسۋى مۇمكىن جەردى كورسەتە الاتىنىن ايتقان.

«اۋە كولىگىنەن شارىن وزەنىنىڭ سول جاعاسىندا، وقيعا ورنىنان 3-4 شاقىرىم جەردە ءبىر ادامنىڭ جاتقانىن بايقادىق. الايدا ول جەرگە تىكۇشاق قونا المايتىن بولىپ شىقتى. شاتقال بيىكتىگى شامامەن 800-1500 مەتر. ول جەردىڭ جاعاسى جارتاستى كەلەدى. مەن تىكۇشاقتان شاتقال ۇستىندە ءتۇسىپ قالىپ، ءۇش ادامنان تۇراتىن قۇتقارۋ توبىنا راتسيا ارقىلى باعىت-باعدار بەرىپ تۇردىم. ولار ارقانمەن وزەنگە قاراي ءتۇسىپ، جوعالعان قىزدى جوعارى كوتەردى. قىزدىڭ اماندىعىن كورىپ، قۋانىشتان اتا-اناسىنا بىردەن راتسيا ارقىلى حابار بەردىم. قۇتقارۋشى توپتىڭ وتە كاسىبي جۇمىس ىستەگەنىن اتاپ وتكىم كەلەدى. قارشاداي قىزدىڭ قاراڭعىدا، تاۋدا باسىنان نە وتكەرگەنىن ەلەستەتۋ قيىن. بالاپان تەز جازىلىپ، ومىرىندە تەك جاقسىلىق بولسىن»، - دەدى پوليتسيا قىزمەتكەرى سايات داركەنباي.

ەسكە سالايىق، 29- مامىر كۇنى الماتىنىڭ 199№ مەكتەبىنىڭ 5-سىنىبىندا وقيتىن 8 وقۋشى، 5 اتا-انا جانە 3 مۇعالىم شارىن شاتقالىنا ساياحاتقا شىققان. شاتقالدا كەنەت سەل ءجۇرىپ، 2 ادام مەرت بولدى، 1 ادام ءىز-ءتۇزسىز جوعالىپ، تاعى 6 اۋى زارداپ شەكتى.

كەيىننەن ق ر ءبىلىم جانە عىلىم مينيسترلىگى اتالعان وقيعا سالدارىنان 1 وقۋشى مەن 1 مۇعالىمنىڭ قازا تاپقانىن، تاعى ءبىر وقۋشىنى ىزدەۋ جۇمىستارى جۇرگىزىلىپ جاتقانىن ءمالىم ەتتى.

مەرت بولعان ۇستاز - 26 جاستاعى مەرەي يبراگيموۆ كوركەمونەر پاندەرىنەن ساباق بەرگەن. ەڭبەك ءوتىلى - 5 جىل.

30- مامىردا سەلگە اعىپ كەتكەن وقۋشى قىز تابىلدى. قازىر ول جانساقتاۋ بولىمىندە. ونى قۇتقارۋ ساتىنەن ۆيدەو جاريالاندى. بۇگىن ق ر ب ع م بالالار قۇقىعىن قورعاۋ كوميتەتىنىڭ ءتوراعاسى ەسەنعازى يمانعاليەۆ بۇل ساياحات مەكتەپ اكىمشىلىگىمەن كەلىسىلمەگەنىن ءمالىم ەتتى.