الماتى - نۇر-سۇلتان رەيسىنىڭ ۇشاعىندا جولاۋشى جانجال شىعاردى
«جانجال شىعارعان جولاۋشىنى ۇشاقتان شىعارۋعا بايلانىستى رەيس كەشىكتى. جولاۋشىعا تىركەۋ كەزىندە جانە بورتقا وتىرعىزۋ ءراسىمى كەزىندە جۇگىن تىركەمەسە، رەيسكە جىبەرىلمەيتىنى تۋرالى ەكى مارتە ەسكەرتىلدى. ويتكەنى تاسىمالداۋ ەرەجەلەرىنە سايكەس بورتقا ءبىر قول جۇگى بار جولاۋشىلار عانا جىبەرىلەدى» دەپ ءمالىم ەتتى كومپانيانىڭ باسپا ءسوز قىزمەتى.
ونداعىلاردىڭ ايتۋىنشا، اتالعان جولاۋشى اۆياكومپانيا قىزمەتكەرلەرى تالابىن ورىنداماعان. جولاۋشى اشۋ-ىزاسىن كورسەتىپ، قىزمەتكەردى يتەرىپ، بورتقا كىرەدى.
«باسقا جولاۋشىلارعا قولايسىزدىق تۋعىزعانى وكىنىشتى. الايدا اۆياكومپانيا ەرەجەلەرىن ساقتاماعان جاعدايدا ءبىز اۆياتسيالىق قاۋىپسىزدىك راسىمدەرىن ۇستانۋعا ءماجبۇرمىز. جولاۋشىنى بورتتان شىعارعان كەزدە ءبىز اۋە كەمەسى مەن جولاۋشىلاردى قايتا تەكسەرۋگە ءتيىسپىز»، - دەپ ءتۇسىندىردى FlyArystan باسپا ءسوز قىزمەتى.
اۆتور: الما مۇقانوۆا
