تاۋدا جوعالعان ەكى تۋريستى ىزدەۋگە وزبەكستان قۇتقارۋشىلارى دا جۇمىلدىرىلدى - فوتو

تۇركىستان. قازاقپارات - تۇركىستان وبلىسى تولەبي اۋدانىندا تاۋدا جوعالعان ەكى تۋريستى ىزدەۋگە وزبەكستاندىق قۇتقارۋشىلار دا جۇمىلدىرىلدى.

بۇل تۋرالى ءوڭىردىڭ ت ج د باستىعىنىڭ ورىنباسارى ەرىك سارىبايەۆ مالىمدەدى، دەپ حابارلايدى قازاقپارات ءتىلشىسى.

ەرىك سارىبايەۆتىڭ ايتۋىنشا، كورشى ەلدىڭ قۇتقارۋشىلارى ىزدەۋ شارالارىن كەشەدەن باستاپ جۇرگىزىپ جاتىر.

«ىزدەۋ شارالارى باستالعالى بەرى 350 شاقىرىمنان اسا اۋماق جاياۋ ارالاندى. سونىمەن قاتار ۇشقىشسىز ۇشۋ اپپاراتتارىن پايدالانۋ ارقىلى 170 شاقىرىمعا جۋىق اۋماق زەرتتەلدى. «قازاۆياقۇتقارۋ» اق ەكى تىكۇشاعى ارقىلى 3400 شاقىرىم اۋماققا اۋەدەن باقىلاۋ جۇرگىزىلدى. قازىرگى تاڭدا ىزدەۋ جۇمىسىنا ت ج د، پوليتسيا، ۇ ق ك شەكارا قىزمەتىنىڭ شەكاراشىلارى، ۇلتتىق پارك قىزمەتكەرلەرى جۇمىلدىرىلعان. ءوزارا ءىس-قيمىل جوسپارىنا سايكەس، كەشەدەن باستاپ وزبەكستان رەسپۋبليكاسى، تاشكەنت وبلىسى، ت ج باس باسقارماسىنىڭ قىزمەتكەرلەرى دە ءوز اۋماقتارىندا كىرىسىپ وتىر. ىزدەستىرۋ جۇمىستارى ءالى جالعاساتىن بولادى»، - دەدى ەرىك سارىبايەۆ.

ەسكە سالايىق، تولەبي اۋدانىنىڭ سايرام- وگەم مەملەكەتتىك ۇلتتىق تابيعي پاركىنىڭ اۋماعىندا 7 ادامنىڭ جوعالعانى تۋرالى حابارلاما 25-مامىردا تۇسكەن بولاتىن.

ونىڭ ۇشەۋى امان-ەسەن تابىلىپ، ۇيىنە قايتارىلدى. ال، 29-مامىر كۇنى ساعات 00:30-دا ۇزدىكسىز ىزدەستىرۋ جۇمىستارىنىڭ بارىسىندا وگەم وزەنىنەن ءبىر ادامنىڭ جانسىز دەنەسى تابىلدى. ول 1999 -جىلى تۋعان تاۋدا جوعالىپ كەتكەن تۋريستەر توبىنىڭ ءبىرى ەكەنى انىقتالدى.

ەكىنشى جىگىتتىڭ دەنەسى وگەم وزەنىنەن 3 شاقىرىم جەردەن تابىلعان.

قالعان ەكى ادامدى ىزدەستىرۋ جۇمىستارى جالعاسۋدا. جەردەگى ىزدەستىرۋدى قۇتقارۋشىلار، پوليتسيا قىزمەتكەرلەرى، شەكارا قىزمەتىنىڭ ات ءپاترۋلى، ۇلتتىق پارك قىزمەتكەرلەرى جانە جوعالعانداردىڭ تۋىستارى جۇرگىزۋدە. سونداي- اق، اۋەدەن ىزدەۋ ءۇشىن ق ر ت ج م «قازاۆياقۇتقارۋ» ا ق ەكى بورتى جۇمىس ىستەپ جاتىر.

اتالعان فاكتى بويىنشا تۇركىستان وبلىسىنىڭ پوليتسيا دەپارتامەنتى سوتقا دەيىنگى تەرگەۋدى باستادى. ساراپتاما تاعايىندالدى، ولاردىڭ ناتيجەسى بويىنشا ءولىمنىڭ سەبەبى انىقتالادى.

ەسكە سالا كەتەيىك، ءبىز وسىعان دەيىن تۇركىستان وبلىسىندا 7 ادامنىڭ جوعالىپ كەتكەنىن جازعان ەدىك. سونداي-اق ىزدەۋ جۇمىسىنا تىكۇشاق جۇمىلدىرىلعانى ايتىلدى. كەيىننەن جوعالعان جەتى ءتۋريستىڭ ۇشەۋى امان تابىلعان بولاتىن. ەكى كۇننەن كەيىن تاعى ەكى ستۋدەنتتىڭ دەنەسى تابىلدى.

اۆتور: اينۇر اقبايەۆا