قۇجاتسىز تۇلعالار كىمگە جۇگىنە الادى
بۇل سۇراققا كوشى- قون قىزمەتى كوميتەتىنىڭ ءبولىم باسشىسى عاني شىمىربايەۆ ءى ءى م-نىڭ ونلاين بريفينگىندە جاۋاپ بەردى، دەپ حابارلايدى قازاقپارات.
«بۇگىنگە دەيىن قۇجاتسىز تۇرىپ كەلگەن تۇلعالار تۇرعىلىقتى جەردەگى ورگاندارعا جۇگىنۋى كەرەك. قولىندا جەكە باسىنا قاتىستى قانداي دا ءبىر قۇجات بولسا، ازاماتتىق مارتەبەسىن انىقتاۋ وڭايىراق بولادى. تۋۋ تۋرالى كۋالىگى، ءبىلىمى تۋرالى اتتەستات نەمەسە انىقتاما، اسكەري بيلەت نەمە تۋۋ تۋرالى تىركەۋ قۇجاتى سياقتى كەز كەلگەن قۇجاتى پايداعا جارايدى»، - دەدى كوشى-قون كوميتەتىنىڭ وكىلى.
ونىڭ ايتۋىنشا اتالعان قۇجاتتار ارقىلى كوشى-قون قىزمەتىنىڭ قىزمەتكەرلەرى رەسمي سۇراۋ سالىپ، تۇرعىننىڭ قاي ەلدى ازاماتى ەكەنىن انىقتايدى.
«ەگەر باسقا ەلدە تۇرعان بولسا نەمەسە باسقا ەلدە تۇرىپ، قۇجاتتارىن سول جاقتا جوعالتقان بولسا، ەلشىلىكتەر ارقىلى اقپارات الامىز. قازىر بۇل اكسيانى ۇكىمەتتىك ەمەس ۇيىمدارمەن بىرلەسىپ وتكىزىپ جاتىرمىز. كەزىندە باسقا ەلدە تۇرىپ، ەسكى ۇلگىدەگى ءتولقۇجات العان ادامداردىڭ دەرەكتەرىن الۋ ءۇشىن كونسۋلدىق الىمدار تولەۋ قاجەت. ەگەر تۇلعانىڭ ەشبىر ەلدىڭ ازاماتى ەمەس ەكەنى دالەلدەنسە، ازاماتتىعى جوق ادامنىڭ كۋالىگى راسىمدەلەدى. ول قىزمەت بۇگىندە شامامەن 23 تىڭ تەڭگە تۇرادى. قۇجاتسىز جۇرگەندەردىڭ كوبىندە وسى اقشانى تولەيتىن مۇمكىندىك بولماي جاتادى. ۇكىمەتتىك ەمەس ۇيىمدار بىزگە وسى تۇرعىدان كوپ كومەكتەسىپ جاتىر»، - دەدى عاني شىمىربايەۆ.
اۆتور: ەسىمجان ناقتىباي
